Яшел Үзәндә "Балаларга шатлык" хәйрия акциясе узачак

22-23 август көннәрендә Яшел Үзәндә "Балаларга шатлык" дип исемләнгән гомумшәһәр хәйрия акциясе узачак. Аны "Golden Stars" иҗат берләшмәсе һәм "Алтын йөрәк" хәйрия проекты оештыра.

Акция кысаларында аз тәэмин ителгән гаиләләр, балалар йорты һәм "Гнездышко" социаль приюты өчен кием-салым, уенчыклар һәм китаплар җыю күздә тотыла. Акциядә Яшел Үзәндә яшәүче һәркем катнаша ала. Акциянең максаты - дәүләт хакимияте органнары, эшкуарлар һәм гади гражданнарның игътибарын ятим һәм яклаучысыз калган балаларның язмышына җәлеп итү, шулай ук кризис чорында иң актуаль мәсьәләләр хакында фикер алышу.

Кием-салым, китаплар һәм уенчыкларны кабул итү пунктлары Яшел Үзәннең төп мәйданнарында 22 һәм 23 август көннәрендә эшләячәк. Әйберләрне "Golden Stars" иҗат берләшмәсе вәкилләре кабул итә.

Гражданнарга әлеге чара хакында мәгълүмат бирү максатыннан, мәгълүмати тумбаларда акциядә катнашырга өндәгән игъланнар урнаштырыла. Бу проектка җәмәгатьчелекнең игътибарын җәлеп итү максатыннан шәһәр газеталарында мәгълүмати материаллар басылып чыгачак.

23 августта көннең икенче яртысында "Родина" Мәдәният сарае янындагы мәйданда Яшел Үзән балалар йорты, "Гнездышко" социаль приютында тәрбияләнүчеләр, Яшел Үзәндә яшәүчеләр һәм кунаклар өчен хәйрия финал концерты оештырыла. Анда Яшел Үзән һәм Казаннан килгән артистлар, иҗат коллективлары катнаша.

Акциянең исәп-хисап счетына төрле чыганаклардан килгән акча, төрле кирәк-яраклар, уенчыклар һәм китапларны Яшел Үзән балалар йорты һәм "Гнездышко" социаль приютында тәрбияләнүчеләргә тапшыру күздә тотыла. Акция нәтиҗәләре буенча матбугат конференциясе узачак. Анда Яшел Үзән муниципаль районы хакимияте, халыкны социаль яклау, медицина, Эчке эшләр идарәсе органнары вәкилләре, преприятие-оешма җитәкчеләре катнаша. Иң актив катнашучыларга Рәхмәт хатлары тапшырылачак.