Муниципалитетлар йортларны капиталь ремонттан соң тапшыруны 1 ноябрьгә тәмамларга тиеш

Әгәр республика 2008 елгы капиталь ремонт программасы буенча акчаларны тулысынча файдаланып, алар буенча хисапны 2009 елның гыйнварында гына биргән булса, хәзер шартлар катгыйлана. "Торак-коммуналь хуҗалыкны реформалаштыруга ярдәм фонды турында"гы федераль законга күптән түгел кертелгән кайбер үзгәрешләр нигезендә, төбәкләр быел башкарылган капиталь ремонт эшләре буенча федераль Фонд алдында хисап бирүне быел тәмамларга тиеш. Быел файдаланылмый калган акчалар исә Фондка кире кайтарылырга тиеш була. Әлегә Татарстанда капиталь төзекләндерү эшләре тәмамланган йортларны тапшыру эшләре бик акрын бара. Быел каралган акчаларны кыска вакытта файдаланып бетерү һәм Фонд алдында вакытында хисап тоту өчен, муниципалитетлар күп фатирлы йортларны капиталь төзекләндерү һәм аларны тапшыру эшләрен 1 ноябрьгә тәмамларга тиеш. Бүген ТР Министрлар Кабинетында Премьер-министр Рөстәм Миңнеханов рәислегендә узган видеокиңәшмәдә әнә шундый бурыч куелды.

10 августка булган мәгълүматларга караганда, быелгы капиталь ремонт программасына кергән йортларның 846 сында эшләр тулысынча тәмамланган. Бу еллык планның 36 проценты. Шул ук вакытта аларның 293 е генә Дәүләт торак инспекциясе тарафыннан кабул итеп алынган. Бу программада каралган йортларның нибары 12 проценты дигән сүз. Әзер йортларның вакытында тапшырыла алмавының сәбәпләре төрле. Я документлары вакытында әзерләнми, яки йортта эшләр тиешенчә башкарылып бетми.

ТР төзелеш, архитектура һәм торак-коммуналь хуҗалыгы министры Марат Хөснуллин сүзләренә караганда, бүгенге көндә капиталь төзекләндерү буенча 7 млрд. 793 млн. сумлык эшләр башкарылган (программаның 80 проценты). Хакыйкатьтә зур күләмдә эшләр башкарылуына карамастан, Дәүләт торак инспекциясенә хәзергә 4 млрд. 529 млн. сумлык күләм буенча гына актлар тапшырылып, раслау узган. Башкарылган эшләр актлары буенча казнычылык аша подрядчыларга 4 млрд.33 млн. сум түләнгән. "Башкарылган эшләрнең яртысы буенча подряд оешмалары белән исәп-хисап ясалмаган. Бу, үз чиратында, эшчеләргә хезмәт хаклары түләүдә тоткарлыклар чыгарып, эшләрне үз вакытында башкаруга комачаулый. Мондый вәзгыять ремонт эшләренең сыйфатында да чагылыш табарга мөмкин", -ди министр. Бүгенге киңәшмәдә муниципаль берәмлекләргә башкарылган эшләр актларын Дәүләт торак инспекциясенә, түләү графигын Казначылыкка тапшыру графикларын 17 августка кадәр ТР Төзелеш, архитектура һәм торак-коммунль хуҗалыгы министрлыгына юллау бурычы йөкләнде. Графикларның үтәлеше көн саен министрлык һәм Казначылык хезмәткәрләренең катгый контроленә алыначак, һәм аларның үтәлеше видеоконференцияләрдә тикшереләчәк.

Быел эш барышында республикада капиталь ремонт программасына 3 тапкыр төзәтмәләр кертелеп, яңартылган программа янәдән федераль фондта якланды. Марат Хөснуллин сүзләренә караганда, әле һаман да министрлыкка муниципаль берәмлекләрдән программага корректировкалар кертү турында күпсанлы мөрәҗәгатьләр алына. Алар финансларны экономияләү шартлары белән бәйле. "Быел программага тагын үзгәрешләр кертергә җыенмыйбыз. Бер яктан, килештерү процессы бик күп вакыт сорый. Икенчедән, без болай да артыгын эшләдек. Бер төбәк тә программага елына 3 тапкыр төзәтмәләр кертми. Төзәтмәләр кертү документларның түбән сыйфатта әзерләнүе турында сөйләүче факт. Әгәр мондый юл белән барсак, киләсе елга федераль фондтан өстәмә финанслар алуга өметләнә алмыйбыз", -ди министр. Муниципалитетлар якын араларда быел капиталь ремонт буенча эшләрнең ахыргы күләмен билгеләп, министрлыкка тапшырырга тиеш.

Өстәмә финанслар дигәннән, Татарстан федераль фондтан капиталь ремонтка үзенә каралган лимитны инде быел ук алып бетерүгә карамастан, федераль закон шартларын үтәгәндә, өстәмә ярдәмгә өметләнә ала. Хәзер министрлык бу юнәлештә эш алып бара. Фаразларга караганда, 2010 елда Торак-коммуналь хуҗалыкны реформалаштыруга ярдәм фондыннан республикага 1-2 млрд. сум күләмендә финанслар бүленергә мөмкин.

Премьер-министр Рөстәм Миңнеханов үз чыгышында киләсе елда федераль программага заявка бирү өчен, агымдагы елда капиталь төзекләндерү эшләре буенча сыйфатлы хисап әзерләү бурычын куйды. Премьер шулай ук капиталь ремонт эшләрен сыйфатлы һәм намус белән башкарган төзелеш оешмалары, муниципалитетларны билгеләп үтү чаралары күреләчәген ышандырды.