Татарстанда җәйге ял программасы 80 процентка үтәлгән

Бу җәйдә республикада балалар һәм яшьләрнең җәйге ялларын, мәшгульлеген тәэмин итү, сәламәтләндерү программасы инде 80 процентка үтәлгән. Планга кертелгән 165 мең кешенең 130 меңенең ял һәм мәшгульлеге тәэмин ителгән.

ТР яшьләр эшләре, спорт һәм туризм министры урынбасары Андрей Кондратьев белдергәнчә, җәйге кампанияне лаеклы итеп тәмамлау өчен тагын да тырышырга кирәк булачак. Балалар һәм үсмерләрне савыктыру, аларның ялын һәм мәшгульлеген оештыру буенча "Җәй" ("Лето") республика үзәге мәгълүматларына караганда, бүгенге көндә Татарстандагы 115 стационар лагерьның 111 е ачык. Моннан тыш, балалар өчен 1300 көндезге мәктәп яны лагере оештырылган, мәктәпләр каршында 376 хезмәт һәм ял лагере, 54 палаткалы лагерь эшли. Балаларның күпләп ял итү урыннары буларак 307- ял, 248 спорт мәйданчыгы оештырылган. Аларга 40 меңнән артык бала һәм үсмер җәлеп ителгән.

Әлеге ял формаларыннан тыш, быел да Кырым һәм Краснодар краендагы лагерьлар, "Җәй" үзәгенең филиаллары булган "Приазовец", "Витязево", "Смена", "Золотой колос", "Золотые пески", "Меркурий" лагерьларындагы профильле сменалар зур сорау тапкан. Бу хакта ТР Яшьләр эшләре, спорт һәм туризм министрлыгының матбугат хезмәте хәбәр итә.