ТР да Машина төзелеше буенча Германия-Россия компетенцияләр үзәген төзүгә әзерлек бара

Татарстанда. Үзәк төзелешенең бизнес-планын әзерләү өчен хәзерге вакытта республика предприятиеләре арасында анкеталар тутыру бара. Мондый формадагы сораштырулар предприятиеләрнең гамәлдәге фәнни потенциалын бәяләү һәм яңа технологияләргә ихтыяҗын ачыклау өчен кирәк. Бу атнада ТР Сәнәгать һәм сәүдә министрлыгында предприятиеләр җитәкчеләре белән анкеталар тутыруга багышланган киңәшмәләр уздырыла.

Саксония Хөкүмәте делегациясенең апрель аенда Татарстанга сәфәре вакытында республиканың Сәнәгать һәм сәүдә министрлыгы белән әлеге федераль җирнең Икътисад һәм хезмәт министрлыгы арасында Машина төзелеше буенча Германия-Россия компетенцияләр үзәген төзү турында ниятләр беркетмәсе имзаланган иде. Үзәкне булдыру берничә максатны күздә тота. Россиянең машина, автомобиль төзелеше, авиакосмик сәнәгать предприятиеләре өчен уртак фәнни-тикшеренү проектларын эшләү, тармак предприятиеләре өчен белгечләр әзерләү, квалификациясен күтәрү, биредә матди-техник базаны ныгыту, җиһазларны комплекслы сату системасын эшләү - әнә шундыйлардан.

Компетенцияләр үзәген төзегәндә Фраунхофер станоклар һәм басым белән эшкәртү институты (Саксония, ГФР) моделе файдаланылачак. Әлеге институтны финанслау чыгымнарының яртысын - сәнәгать, 30 процентын федераль җир Хөкүмәте, калганын - федераль Хөкүмәт күтәрә. Институт эшләп чыгара торган технологияләр һәм җиһазлар Татарстан предприятиеләре ихтыяҗларына күбрәк җавап бирә. Киләчәктә үзәк хезмәтләрен төбәк дәрәҗәсендә генә түгел, федераль дәрәҗәдә дә күрсәтү нияте бар. Компетенцияләр үзәген урнаштыру өчен мөмкин булган мәйданнарның берсе - уку-тикшеренү базасы булган Туполев исемендәге Казан дәүләт техник университеты. Әлеге үзәк эшчәнлеге республика предприятиеләрендә хезмәт җитештерүчәнлеген күтәрүгә, ресурсларны экономияләргә, продукциянең сыйфатын, белгечләрнең квалификациясен күтәрүгә ярдәм итәчәк.