Mountair AG компаниясе Татарстанда производствосын ачу мөмкинлеген карый

ТР Премьер-министры Рөстәм Миңнеханов бүген "ИнтерТехно" һәм Mountair AG компанияләре җитәкчеләре - Евгений Чирков һәм Макс Аберхард белән очрашты. Очрашуда республиканың кайбер эре объектларын климатик җиһазлар белән тәэмин итү буенча хезмәттәшлек хакында сүз барды.

"ИнтерТехно" компаниясе Швейцариянең Mountair AG фирмасының Россиядәге рәсми дистрибьютеры. Климатик җиһазлар җитештерү өлкәсендә алдынгы позицияләрне биләүче Mountair AG компаниясенең штаб-фатиры һәм җитештерү куәтләре Кройцлинг шәһәрендә (Швейцария) урнашкан. Дөнья базарында ул вентиляция, кондиционер, энергия үзгәреше системаларын җитештерүче һәм тәэмин итүче буларак билгеле. Биредә җайланмалар һәм агрегатлар заказга эшләнә. Энергия саклау технологияләрен актив куллану һәм үстерү компаниянең төп үзенчәлеге санала.

Татарстанда Mountair AG продукциясе төрле спорт корылмаларын, Боз сарайларын, универсаль спорт залларын җиһазландыруда кулланыла. Бүгенге очрашуда компания җитәкчелеге кайбер юнәлешләрдә Татарстан белән хезмәттәшлекне киңәйтү мөмкинлеген белдергән. Компания, аерым алганда, Татарстан террриториясендә производствосын ачарга ниятли. Яңа производство Казанның Химическая урамында урнашырга мөмкин, дип хәбәр итә ТР Министрлар Кабинетының матбугат хезмәте.