Казан агломерациясе территорияләренең үсеше хакында фикер алыштылар

Лаешта Казан агломерациясе территорияләренең гамәлдәге һәм перспектив үсеше хакында фикер алыштылар. Әтнә, Югары Ослан, Биектау, Яшел Үзән, Лаеш, Питрәч муниципаль районнары һәм Казан шәһәре җирле үзидарә органнары, предприятиеләре җитәкчеләрен җыйган бу киңәшмә ТР икътисад министры Марат Сафиуллин рәислегендә узды.

Казан агломерациясе - республиканың динамик үсештәге икътисади зоналарының берсе. Территория машина төзелеше, металл эшкәртү, химия һәм нефть химиясе сәнәгате, төзелеш материаллары җитештерү, электр энергетикасы, азык һәм җиңел сәнәгать, агач эшкәртү, полиграфия, хезмәтләр күрсәтү буенча махсуслашкан.

Агломерациягә кергән территорияләргә килгәндә, сәнәгатьтә җитештерү индексы буенча Лаеш районы аеруча динамик үсеш күрсәтә. Сәнәгатьтә җитештерүнең икеләтә артуын биредә май сыгу заводы тәэмин итә. Казан икътисади зонасына кергән авыл хуҗалыгы районнары агросәнәгать күрсәткечләре (аерым алганда терлекләрнең баш саны арту) буенча уңай нәтиҗәләр бирә. Шул ук вакытта Югары Ослан районында терлек һәм кош-корт үрчетү буенча күрсәткечләр түбән.

Кризис шартларында төп бурыч - халыкның керемнәрен һәм яшәү дәрәҗәсен саклап калу. Шушы күрсәткеч буенча Казан агломерациясендәге күпчелек территорияләрдә уңай динамика саклана. Марат Сафиуллин шулай да кайбер районнарда хезмәт хакы һәм халыкның сатып алу сәләте күрсәткечләренең төшүенә юнәлтте.

Лаешта узган киңәшмәдә республикада глобаль кризисның тискәре йогынтысын кисәтү чаралары буенча комплекслы программаның үтәлеше, ил, республика һәм муниципалитет тормышында әһәмиятле роль уйнаучы предприятиеләргә кризис шартларында дәүләт ярдәме хакында да сүз булган. Казан агломерациясе территориясендәге предприятиеләрнең 16 сы стратегик предприятиеләрнең гомумфедераль исемлегенә кертелгән, 108 е- республика һәм территорияләр өчен аеруча әһәмиятле предприятиеләр исемлегендә урын алган.

Киңәшмәдә шулай ук әлеге икътисади зонага кергән территорияләрдә кризиска каршы чараларның гамәлгә ашырылуы да тикшерелде, дип хәбәр итә ТР Икътисад министрлыгының матбугат хезмәте. Узган ярты ел эчендә Әтнә районында 302 эш урыны булдырылып, шуның 282 се иҗтимагый эшләр өлешенә туры килә. Биектау районында - 477, Яшел Үзән районында -2236, Питрәч районында - 556, Казанда- 3545 кеше иҗтимагый эшләргә җәлеп ителгән. Бу чорда эшсез гражданнар арасыннан Югары Осланда - 5 кеше, Биектау һәм Яшел Үзән районнарында утызар кеше, Питрәч районында - 51, Казанда - 96 кеше үз эшен ачуга ирешкән.