РФ Сәнәгать һәм сәүдә министрлыгы "КАМАЗ" ААҖнә 270 миллион сум акча бүлеп бирде

Россия Федерациясе Сәнәгать һәм сәүдә министрлыгы Татарстан Республикасының хезмәт базарында киеренкелекне киметү буенча төбәк программасында сәнәгать предприятиеләренең катнашуын өстәмә финанслауны күздә тотып биргән заявкасын хуплады.

Россия Федерациясе субъектлары хезмәт базарында киеренкелекне киметүгә юнәлдерелгән чараларны гамәлгә ашыру буенча Ведомствоара эшче төркем утырышы кысаларында Татарстан Республикасының төбәк программасындагы үзгәрешләр каралды.

Программа нигезендә, республика сәнәгать предприятиеләрендә вакытлы эш урыннары булдыруга өстәмә акчалар бүлеп бирелә.

"Программага төзәтмәләр кертү нәтиҗәсендә "КАМАЗ" ААҖ хезмәткәрләре өчен вакытлы эш урыннары булдыруга ел башында ук расланган, 254 миллион сум тәшкил иткән чыгымнардан тыш, 270 миллион сумнан артык акча бүлеп бирү турында карар кабул ителде. Шул рәвешчә, Чаллыдагы иң эре предприятиедә мәшгульлеккә ярдәм күрсәтүгә дәүләт субсидияләренең гомуми күләме ярты миллиард сумнан артып китәчәк. Бу мәшгульлек дәрәҗәсен һәм 16845 кешенең керемнәрен саклап калырга мөмкинлек бирәчәк", - дип ачыклык кертте Россия Федерациясе сәнәгать һәм сәүдә министры урынбасары Станислав Наумов.

Соңгы вакытта автозавод ике сменада дүрт көнлек эш атнасы буенча эшли. Мондый режим предприятие җитәкчелегенә җитештерүне туктатмау белән бергә, хезмәт коллективын саклап калырга да мөмкинлек бирде. Ә бу автозаводтагы социаль сәясәтнең төп бурычы санала, дип хәбәр ителә РФ Сәнәгать һәм сәүдә министрлыгы сайтында.