"2013 елгы Казан Универсиадасының башкарма дирекциясе" автономияле оешмасы төзелде

5 августта ТР Премьер-министры Рөстәм Миңнеханов Мәскәүдә "2013 елда Казанда узачак XXVII җәйге Универсиаданың башкарма дирекциясе" н гамәлгә куючыларның гомуми җыелышында һәм аның Күзәтүчеләр советы утырышында катнашты. РФ спорт, туризм һәм яшьләр сәясәте министры Виталий Мутко рәислегендә узган утырышта "2013 елгы Казан Универсиадасы башкарма дирекциясе" автономияле коммерцияле булмаган оешмасын төзү турында карар кабул ителде. Яңа структураның генераль директоры итеп Владимир Леонов билгеләнде.

Күзәтүчеләр советы Универсиада башкарма комитетының югары идарә органы булачак. Гамәлгә куючылар җыелышында аның рәисе итеп Виталий Мутко, рәис урынбасары итеп Рөстәм Миңнеханов сайланды. Күзәтүчеләр советы составына РФ спорт, туризм һәм яшьләр сәясәте министры урынбасары, Казан Универсиадасына әзерлек һәм аны уздыыру буенча оештыру комитеты җаваплы секретаре Наталья Паршикова, ТР яшьләр эшләре, спорт һәм туризм министры Марат Бариев, Казан мэры Илсур Метшин, шәһәр башлыгының беренче урынбасары Иршат Минкин, Россия студентлар спорты берлеге президенты Олег Матыцин һәм берлекнең башкарма комитеты әгъзасы Виктория Черкесова керде. Күзәтүчеләр советы әгъзалары Универсиаданың башкарма дирекциясе эшчәнлегенең стратегик юнәлешләрен билгеләячәк. Шулай ук яңа структураның халыкара оешмалар белән хезмәттәшлеген җайга салуга ярдәм итәчәк.

Бүгенге утырышта әлеге автономияле оешманың уставы, дирекциясенең оештыру структурасы һәм аның 2009 елга эш паны расланды, дип хәбәр итә Министрлар Кабинетының матбугат хезмәте.