Республика инжиниринг компаниясе төзеләчәк

Гамәлдәге нефть эшкәртү, нефть химиясе производстволарын модернизацияләү, төзелә торганнарын җиһазландыру өчен металл конструкцияләр, прибор продукцияләре белән тәэмин итү бүген иң перспектив өлкә санала. Татарстанның машина төзелеше предприятиеләрен республика эчендәге кооперация кысаларында шундый заказлар белән тәэмин итү, аларга финанс кризисының тискәре йогынтысыннан котылырга, үсешнең яңа дәрәҗәсенә чыгарга ярдәм итәчәк. Шундый кооперацияне оештыру һәм бу эшне координацияләү үзәге Республика инжиниринг компаниясе булачак. Бүген ТР Сәнәгать һәм сәүдә министрлыгында әлеге инжиниринг компаниясен төзү мәсьәләсенә багышланган киңәшмә узды. Министр Равиль Зарипов рәислегендә узган чарада "Татнефтехиминвест-холдинг" ААҖ генераль директоры Рафинат Яруллин, "Татнефть" ААҖ баш инженеры урынбасары Рөстәм Әхмәтҗанов һ.б. катнашты.

Инжиниринг компаниясен төзү концепциясен эшләү ТР сәнәгать һәм сәүдә министры рәислегендәге эшче төркемгә йөкләнгән. Компаниянең эшчәнлеге Татарстан территориясендә инвестиция проектларын гамәлгә ашыручы машина һәм приборлар төзелеше, нефть химиясе комплексы предприятиеләре арасында кооперация элемтәләрен үстерүгә юнәлдереләчәк.