Казан Ратушасында Татарстан волонтерларын хөрмәтләделәр

6 августта Казан Ратушасында XXV җәйге Белград Универсиадасында эшләгән Татарстан волонтерларын хөрмәтләделәр. ТР Хөкүмәте башлыгы Рөстәм Миңнеханов һәм Казан мэры Илсур Метшин катнашында узган әлеге чарага шулай ук волонтерлар укыган югары уку йортлары ректорлары да чакырылган иде.

Июль аенда Сербия башкаласында узган XXV җәйге Универсиада дөньяның 43 иленнән 8 меңнән артык студент спортчыны үзенә җыйды. Бу ярышлар Россия җыелма командасы өчен гаять уңдырышлы булды. Командалар арасындагы зачетта беренчелекне алган россиялеләр исәбендә барлыгы 76 медаль булса, шуның 26 сы -алтын. Алты медаль( шуның икесе алтын) -Татарстан спортчылары өлеше. Ил җыелма командасы составында Россия данын Татарстаннан барлыгы 11 спортчы яклады.

Бу җиңүне яулауда спортчылар белән бергә волонтерлар командасы да зур өлеш кертте. Универсиадада эшләгән 10 мең волонтер арасында Татарстан волонтерлары иң эре чит ил делегацияләренең берсе иде. Үз хезмәтләре белән Россия һәм туган республикалары данын якларга тиешле 150 егет һәм кыз конкурс нигезендә сайлап алынган "беренче карлыгачлар" булды. ТР Яшьләр эшләре, спорт һәм туризм министрлыгы белән 2009 елгы Универсиаданы оештыру комитеты арасында бу волонтерларның Белград уеннарында катнашуы турындагы килешү 2013 елда Казанда узачак җәйге Универсиадага белгечләр әзерләү һәм Татарстанда волонтерлык хәрәкәтен үстерү кысаларында төзелгән иде. Татарстан волонтерлары делегациясе җитәкчесе Лилия Бариева сүзләренә караганда, конкурс комиссиясенә 1000 нән артык заявка алынган булган. 370 студент белән аерым әңгәмәләр оештырылган. Инглиз телен белү, спорт турнирларын әзерләү һәм үткәрүдә катнашу тәҗрибәсе булу, яңа шартларга тиз җайлаша белү һәм командада эшли алу сәләте аларны сайлап алуда төп критерийлар булган. Җиңеп чыккан 150 егет һәм кыз - Яшьләр эшләре, спорт һәм туризм министрлыгы вәкилләре, республиканың 20 вузы студентлары, аларны тәмамлаучылар. Иң күп волонтерларны КДУ, Туполев исемендәге КДТУ, ТДГПУ, КДФИИ һәм КДТУ биргән.

Алар 3 атна дәвамында Белград Универсиадасының 13 департаментында эшләде. Ярышларда катнашучы спортчылар командалары арасында атташелар департаментында эшләгән Татарстан волонтерлары аеруча зур популярлык казанган. Әлеге департаментта безнекеләргә башта 5 урын планлаштырылган булса, чынлыкта 13 урын алуга ирешкәннәр. Безнең егетләр һәм кызлар эшеннән Сербия Универсиадасын оештыручылар да, катнашучылар да канәгать калган. Аларның тәртибе, эшкә мөнәсәбәте, шәхси сыйфатлары мактауга лаек дип билгеләп үтелгән. Татарстан волонтерларына төрле дәрәҗәдәге халыкара чараларны кабул итәргә җыенган кайбер башка ил вәкилләре хезмәттәшлек тәкъдим иткән. 2011 елда Төркиядә узачак кышкы Универсиада шундыйлардан.

Татарстан волонтерлары делегациясе җитәкчесе Лилия Бариева белдерүенчә, Белгардта чыныгу алган бу егетләр һәм кызлар алга таба да актив волонтерлык эшчәнлеген дәвам итеп, 2013 елда Казанда җәйге Универсиаданы оештыру һәм уздыруда катнашырга ниятли. Инде быел ук алар үз тәҗрибәләрен туган республикаларында файдалана алачак. Октябрь аенда Казанда "Россия-спорт державасы"дигән Беренче Бөтенроссия спорт форумы уза.

Бүгенге очрашуда ТР Премьер-министры Рөстәм Миңнеханов волонтерларга, алар белем алган вуз җитәкчеләренә аерым рәхмәт белдерде. "Татарстан волонтерларының иң югары бәя алуы ул Россиягә, Татарстанга куелган бәя дә. Бу олы спорт чарасында катнашып, сез зур тәҗрибә тупладыгыз. Аны алга таба үстереп, башка студентларга да тапшырырга тиешбез", -дип белдерде ул. Универсиада барган көннәрдә ТР Премьер-министры Белградка сәфәре барышында биредә студентлар шәһәрчегендә булып, Татарстан волонтерлары белән очрашкан иде. Шул вакытта Хөкүмәт башлыгы иң яхшы эшчәнлек күрсәткән волонтерларның бүләкләнәчәген ышандырган иде. "Без вәгъдәне үтибез", -диде ул бүген залга җыелучыларга. Бүген Татарстан волонтерлары җитәкчеләре Лилия Бариева, Марат Бохараев, Ләйлә Фәхретдиновага, шулай ук 16 волонтерга ТР Хөкүмәте һәм Казан шәһәре мэриясенең уртак бүләкләре - Рәхмәт хатлары белән ноутбуклар тапшырылды. Ә волонтерлар исә, үз чиратында, Хөкүмәт башлыгына Студентлар спорты уеннары мизгеләләре мәңгеләштерелгән фотоальбом белән Белград Универсиадасы талисманын бүләк итте.