Чаллы Россиянең рекордлар китабына керде

Чаллы иң озак дәвам иткән эстафета буенча Россия рекорды куйды. Моны бүген Россия рекордлар китабының баш мөхәррире Алексей Свистунов раслады.

Старттан соң бер тәүлек вакыт узгач, 11.00 сәгатьтә "Төзүче" стадионында 4799 кеше Чаллы данын яклады.

Бүген 11.00 сәгатьтә шәһәр башкарма комитеты җитәкчесе Васил Шәйхразиев 100 метр араны йөгереп узды.

"Мондый җиңүләрне шампан шәрабе белән билгеләп үтәргә кирәк, ә биредә табигать үзе безнең өчен шатлана һәм яңгырга коендыра!", - диде Васил Шәйхразиев үзен финишта каршылаган журналистларга.

Ул финишка килеп җиткәч, Чаллыда яшәүчеләрне ТР Премьер-министрының беренче урынбасары Равил Моратов, шәһәр мэры Илдар Халиков, Россия рекордлар китабының баш мөхәррире Алексей Свистунов тәбрикләде.

"Чаллы безне гаҗәпләндерүдән туктамый, - дип уртаклашты үзенең хис-кичерешләре белән Равил Моратов. - Әлеге чара шәһәрнең бердәм булуын һәм күп нәрсәгә сәләтле икәнлеген күрсәтте. Рәхмәт сезгә!".

"Минем җиңәчәгебезгә шигем юк иде. Мин эстафетада катнашкан 5 меңгә якын кешенең һәркайсы Россия чемпионы булуга бик тә шат. Барлык катнашучыларны, аларның гаиләләрен һәм коллективларны чын күңелдән котлыйм. Рекордлар китабында "Чаллы - иң яхшы спорт казанышы" дигән язуның пәйда булуы шатлыклы күренеш", - диде Илдар Халиков.

Алексей Свистунов шәһәр мэрына иң озак дәвам иткән эстафета буенча Россия рекорды куюны раслаган таныклык тапшырды. "Чаллы тарихка танылган автомобильләр җитештерүче шәһәр буларак кына кереп кенә калмады, бүген бөтен дөнья әлеге калада спортны яратучы кешеләр яшәвенең шаһиты булды. 4799 кеше бер тәүлек дәвамында 100 метр араны йөгереп узды. Бу Чаллының рекорд куюын раслый һәм сезне моның белән чын күңелдән тәбрик итәм!".

Чаллының Гиннесның рекордлар китабына керү-кермәве сентябрь аенда билгеле булачак. Аңа кадәр Лондонда Чаллы фотографлары һәм телеоператорлары төшергән базаны караячаклар һәм катнашучыларның исемлеген тикшерәчәкләр.