Р.Миңнеханов: "Киләсе елга метроның яңа станциясен тапшыру бурычы тора"

"Кәҗә бистәсе"ннән "Кремль" станциясенә таба 2008 елның 12 маенда уң як тоннельне казу эшенә керешкән "Алтынчәч" тоннель казу комплексы бүген 2242 метрның соңгы метрын үтеп, "Кремль" станциясендәге демонтаж камерасына килеп чыкты.

Бүген шушы вакыйга уңаеннан оештырылган тантаналы вакыйганы ачып, "Казметрострой" муниципаль унитар предприятиесе җитәкчесе Марат Рәхимов: "Шушы тоннельне казу эшенә керешеп, 15 айга якын вакыт эчендә Казансу елгасы төбеннән юл салынып, алга таба төзелеш эшләренә мөмкинлек бирелә. Киләсе елга Республика һәм Шәһәр көннәренә "Кәҗә бистәсе" станциясен, Мәскәү һәм Вахитов районнарын тоташтырган юлны кулланылышка тапшырачакбыз", - дип вәгъдә бирде.

ТР Премьер-министры Рөстәм Миңнеханов исә, финанс яктан хәзерге дөньякүләм кризис китергән авыр шартларда метро салу эше дәвам иттерелүен белдереп: "Быел инвестицион программалар киметелсә дә, метро төзелеше программасы Татарстан Президенты тарафыннан быел да һәм киләсе елга да гамәлдә калдырылды, димәк, ышанычны аклап, киләсе елга яңа станцияне тапшыру бурычын үтәргә кирәк", - дип басым ясап әйтте. Чыгышының соңында ТР Хөкүмәте җитәкчесе якынлашып килгән Төзүчеләр көне белән вакыйга хуҗаларын котлап, аларның үзләренә дә, казанлыларга да хезмәтләре белән зур бүләк ясауларын искәртте һәм, алга таба да метро төзелешен финанслаячакбыз, дип ышандырды.

Казан шәһәре мэры Илсур Метшин метро төзүчеләргә мөрәҗәгать итеп: "Сез чираттагы тапкыр үзегезне иң яхшы яктан күрсәтә алдыгыз: килешенгән срокларда Казансу елгасы астыннан үтеп, 2 тоннельне дә казып бетереп, станция төзү эшенә керешүгә юл ачтыгыз. Узган ел ахырында "Җиңү проспекты" станциясен кулланылышка тапшырып, без барыбыз да ничә тапкырга пассажирлар саны артуын күрдек. Киләсе елга елга аръягын шәһәр үзәге һәм Икенче Таулар микрорайоны белән тоташтыруны түземсезлек белән һәммәбез дә көтәчәкбез", - диде һәм республика җитәкчелеген метро төзелешен финанслауны туктатмаулары өчен рәхмәт сүзләрен җиткерде.