Казанга Россиянең иң яхшы эксперт-криминалистлары килде

4 августта РФ Эчке эшләр министрлыгының Казан юридик институты базасында РФ субъектлары буенча эчке эшләр органнары эксперт-криминалистика бүлекчәләре эксперт-биологларының Бөтенроссия семинары башланды. Семинарның төп темасы - "Кеше ДНКсына экспертиза үткәрү практикасын камилләштерү".

Семинарга Россиянең 31 төбәге, Белоруссия һәм Германиядән барлыгы 40 эксперт килде.

ТР эчке эшләр министры урынбасары Олег Степущенконың сүзләренә караганда, криминаль бурычларны хәл итү буенча ДНК экспертизасы Татарстанда 2006 елдан бирле үткәрелә. "РФ Эчке эшләр министрлыгының финанс ягыннан ярдәм күрсәтүе нәтиҗәсендә без тулы бер эксперт-криминалистика үзәге булдыруга ирештек, анда теләсә нинди катлаулылыктагы ДНК тикшеренүләре үткәрергә мөмкин. Хәзер, иң яңа җиһазлар ярдәмендә, яңа бүлек оештыру мөмкинлеге туды. Безнең хезмәткәрләр быелның беренче яртыеллыгында гына да 750 дән артык экспертиза үткәрде, бу аеруча зур шау-шу кузгаткан җинаятьләрне ачарга мөмкинлек бирде", - дип ассызыклады ул.

Үз чиратында, РФ Эчке эшләр министрлыгының эксперт-криминалистика үзәге бүлеге башлыгы Анна Рыбакова Татарстандагы коллегаларының эшен югары бәяләде. "Семинарны үткәрү урыны очраклы рәвештә генә сайланмады. Татарстан экспертлары быелның башында үзләрен яхшы яктан күрсәтте. Хәзерге вакытта Россиядә шундый 32 лаборатория эшли", - диде ул.