Татарстанда "Шикәр авыруын диагностикалау буенча мобиль үзәк" проекты старт алды

1 августта Татарстанда "Шикәр авыруын диагностикалау буенча мобиль үзәк" проекты старт алды. Бүгенге көндә проектның әһәмияте бик зур. Соңгы елларда бөтен дөнья күләмендә, шул исәптән Татарстанда да, шикәр авыруыннан җәфа чиккән кешеләр саны арта. 2009 елның 1 гыйнварына булган мәгълүматка караганда, республикабызда 75 мең кеше шикәр чиреннән интегә. 2008 елда шикәр авыруы 8 мең кешедә табыла. Әлеге чир корбаны булганнар күп санда Яңа Чишмә, Балык Бистәсе, Алабуга, Минзәлә районнарында теркәлә, дип хәбәр итте бүген ТР Сәламәтлек саклау министрлыгында үткән матбугат очрашуында сәламәтлек саклау министры урынбасары Руфина Голубева.

Аның сүзләренә караганда, Татарстанда әлеге чир белән авыручыларга югары сыйфатлы медицина ярдәме күрсәтү системасы оеша. Республика клиник хастаханәсе, Республика балалар клиник хастаханәсе, Казан эндокринология диспансеры, Казан дәүләт медицина университеты госпиталь терапия кафедрасының эндокринология курсы белгечләре балаларга һәм өлкән яшьтәгеләргә махсуслаштырылган медицина ярдәме күрсәтә. Проект кысаларында әлеге учреждениеләр белгечләре мобиль үзәк эшен тәэмин итәчәк.

Матбугат очрашуында әйтелгәнчә, шикәр авыруы күзәтү астына алынмаса, якын киләчәктә чир эпидемия рәвешен алачак. Узган ел гына дөньяда 3 миллион 800 мең кеше үлә. Көн дә чирдән 10 мең кеше дөнья куя. Ел саен шикәр чире 6 миллионга якын кешедә теркәлә. Милли иминлек сагында торучы РФ Сәламәтлек саклау һәм социаль үсеш министрлыгы тәкъдим иткән "Шикәр авыруын диагностикалау буенча мобиль үзәк" проектының максаты - Россия төбәкләрендә эпидемиологик тикшеренүләр үткәрү, шикәр авыруының башлангыч стадиясендәге өзлегүләренә диагноз кую, авырулыларга медицина ярдәмен күрсәтүне бәяләү, эндокринология хезмәтен яхшырту һәм үстерү буенча тәкъдимнәр кертү. Соңгы биш елда әлеге проект илебезнең Краснодар крае, Мәскәү, Ленинград өлкәләре, Ростов-на-Дону, Екатеринбург, Түбән Новгород, Төмән, Өфе, Курган һәм башка шәһәрләрендә тормышка ашырыла. Аның нәтиҗәсендә 15 меңгә якын кеше тикшерелә. Мобиль үзәк Казанга беренче мәртәбә 2002 елның декабрендә килә.

1 августтан 20 августка кадәр мобиль үзәк Казанның Республика клиник хастаханәсендә нигезләнәчәк. Биш көн буе белгечләр һәм лаборантлар Казаннан һәм республика территорияләреннән килгән авыручыларны караячак. Биш кабинет заманча диагностика җайланмалары белән җиһазланган. Шунда ук авыру кешеләрне теркәү бүлмәсе дә бар. Шимбә һәм якшәмбе көннәрен белгечләр, районнарга чыгып, санитар-агарту эшен алып бармакчы. Үзәкне оештыручылар үз бурычы итеп күчмә дәвалау-диагностика модуле нигезендә шикәр авыруы булган кешеләрне тикшерү; авыручыларга медицина ярдәмен күрсәтү нәтиҗәлелеген күтәрү; шикәр авыруының соңгы стадиясендәге өзлегүләргә мониторинг үткәрү, пациентларга авыруны контрольдә тоту турында лекцияләр сөйләүне куя. Чара кысаларында эндокринолог-табиблар Казан, Яр Чаллы шәһәрләрендә, Арча, Чистай, Яшел Үзән, Алабуга муниципаль районнарында яшәүче, шикәр авыруыннан җәфа чиккән өлкән кешеләрне һәм балаларны тикшерәчәк. Табиблар Яр Чаллы шәһәренә, Питрәч, Лаеш районнарына барып, җирле халыкка скрининг үткәрәчәк дип көтелә.

Казан дәүләт медицина университеты госпиталь терапия кафедрасының эндокринология курсы белгече Фәридә Вәлиева сүзләренә караганда, барлыгы проект кысаларында 300 кешегә ярдәм күрсәтү күздә тотыла.