ТР министрлыклары эшчәнлегенең нәтиҗәлелек рейтингы бер айдан соң тәкъдим ителәчәк

12 августта ТР Министрлар Кабинетында "Агымдагы елда Татарстан Республикасы дәүләт хакимияте башкарма органнары эшчәнлегенең нәтиҗәлелеге турында" дигән темага киңәшмә узды.

Үзенең кереш сүзендә ТР Премьер-министры Рөстәм Миңнеханов билгеләп үткәнчә, хакимият органнарының нәтиҗәлелеген арттыру мәсьәләсендә зур резервлар бар. Татарстанда эшләнгән индикаторлар республика һәм муниципаль хакимият эшчәнлегенең нәтиҗәлелеген бәяләргә мөмкинлек бирә. Әлеге өлкәдә Сингапур тәҗрибәсе дә өйрәнелде.

"Бу эшне федераль хакимият органнары белән үзара килешеп алып барырга кирәк дип саныйм. Мониторингны автоматлаштыру аеруча мөһим", - дип белдерде Рөстәм Миңнеханов.

Киңәшмәдә төп доклад белән ТР икътисад министры Марат Сафиуллин чыгыш ясады. Ул киңәшмә тәмамланганнан соң гаммәви мәгълүмат чаралары вәкилләренә 8 июльдә ТР Дәүләт Советы сессиясендә Татарстан Президенты Минтимер Шәймиевнең "Татарстан Республикасының 2010-2012 елларга исәпләнгән бюджет һәм финанс сәясәте турында" дигән темага доклад белән чыгыш ясавын искәртте һәм бөтендөнья финанс кризисы шартларында дәүләт идарәсенең нәтиҗәлелеген арттыру кирәклеген билгеләп үтте.

"Безнең өчен теге яки бу дәүләт хезмәткәренең күпме һәм ничек эшләве, аның эшчәнлегенең нәтиҗәлелеген арттыру өчен кайда һәм нинди резервларның булуы мөһим. Бурычларның иң катлаулысы - идарә итүнең нәтиҗәлелеген бәяләү", - дип белдерде Марат Сафиуллин.

Аның сүзләренә караганда, киңәшмәдә ТР Премьер-министры бер ай эчендә ТР Хөкүмәте министрлыклары эшчәнлегенең нәтиҗәлелеге буенча рейтинг тәкъдим итү бурычын куйган. Алынган нәтиҗәләр Татарстан Президенты өчен әзерләнәчәк.

Марат Сафиуллин ЗАГС идарәсе һәм Эчке эшләр министрлыгын мисал итеп китерде - аларда гражданнардан килгән мөрәҗәгатьләр саны кимегән. "Бу әлеге ведомстволарда уңай үзгәрешләр күзәтелүе хакында сөйли", - дип ассызыклады ул.

Татарстанда яшәүче һәркем ТР дәүләт хакимияте башкарма органнарының мәгълүмати ачыклыгын һәм нәтиҗәлелеген ТР Икътисад министрлыгының сайтында бәяли ала.