Казан I Бөтенроссия спорт форумына 1,5 меңләп кешене җыячак

Тиздән Казан шәһәре I Бөтенроссия спорт форумын үзендә үткәрәчәк һәм ул илебездә спорт хәрәкәте үсешенә юнәлдерелгән бик зур вакыйга булачак, дип белдерде бүген мэр Илсур Метшин шәһәр хакимиятенең "дүшәмбе киңәшмәсе"ндә.

Шәһәр башлыгы сүзләренчә, FISU әгъзалары, халыкара спорт федерацияләре җитәкчеләре, спорт индустриясендә киң мәйдан биләгән компанияләр вәкилләре килүе көтелгән форумда РФ Президентының Физик культура һәм спорт үсеше, 2013 елда Казанда XXVII Бөтендөнья җәйге Универсиада, 2014 елда Сочида XXII кышкы Олимпия һәм XI Параолимпия уеннарын әзерләү һәм үткәрү буенча советы әгъзалары катнашачак. Совет составына исә губернаторлар, федераль министрлар, танылган спортчылар кергән. "Казан форумда катнашучыларны кабул итү эшен тиешле дәрәҗәдә оештырырга тиеш, чөнки икенче тапкыр яхшырак тәэсир калдыру мөмкинлеге булмаячак: Бөтенроссия спорт форумын ел саен төрле шәһәрдә үткәрү каралган", - дип, И.Метшин шәһәр җитәкчелегенә шушы максатка юнәлдерелгән бурыч-таләпләр куйды. Республика башкаласы үзендәге Универсиададан соң халыкара киңлектә берничә зур гына ярышлар үткәрергә тиеш, шунлыктан халыкара спорт федерацияләренә шәһәрне һәм аның мөмкинлекләрен иң яхшы яктан күрсәтү таләп ителә, дип басым ясап әйтте ул.

Форумга кадәр Казан Универсиада объектлары исемлегендәге Мәүлетов урамындагы күп функцияле спорт комплексын, Кара-каршы көрәшү сараен, Теннис академиясен кулланылышка тапшыру күздә тотыла. Хәзерге вакытта Казан белгечләре зур халыкара форумнар үткәрүдә тәҗрибәсе булган Берлинда өйрәнү уза.