19 июльдә металлурглар һөнәри бәйрәмнәрен билгеләп үтә

19 июльдә металлурглар һөнәри бәйрәмнәрен билгеләп үтә. ТР Сәнәгать һәм сәүдә министры Равил Зарипов республика металл коючыларына, тармак ветераннарына ТР Хөкүмәте исеменнән котлау юллады.

“Әлеге һөнәр ияләре илебез сәнәгате үсешенә саллы өлеш кертә. Авыр һәм җиңел сәнәгать предприятиеләре эшчәнлеген металл коючылардан башка күзаллап булмый. Татарстанның күп кенә эре һәм урта предприятиеләрендәге металл кою производстволары бүгенге көндә машина төзелешенең нигезен тәшкил итә, сәнәгатьнең башка тармаклары үсеше өчен хезмәт итә.

Глобаль финанс кризисы көчле үсеш кичергән тармакларга зур йогынты ясады. Аның тәэсирен металлургия производстволары да нык тоя. Хәзерге вакытта әйдәп баручы сәнәгать предприятиеләре, федераль, республика министрлык-ведомстволары белгечләре бергәләп тармак предприятиеләренә дәүләт ярдәме күрсәтү юлларын эзли. Бу мәсьәләләрнең чишелеше тармактагы тискәре тенденцияләрне җиңеп чыгарга, металлургия производстволарының конкурентлыгын күтәрүгә ярдәм итәр дигән ышаныч бар. Илнең сәнәгый потенциалын үстерү металлургларның авыр, нәтиҗәле хезмәтенә бәйле. Кыенлыкларга карамастан, металл коючылар көндәшлеккә сәләтле продукция җитештерүне арттыру өчен бөтен көчләрен куя”, -дигән юллар бар бу котлауда.

Министр тармак хезмәтчәннәренә, производство ветераннарына ныклы сәламәтлек, яңа хезмәт уңышлары, бәхет тели.