Минтимер Шәймиев: “Энергия саклау проблемалары Россия өчен төп мәсьәлә булып тора”

2 июль көнне Архангельскида Россия Президенты Дмитрий Медведев рәислегендә РФ Дәүләт Советының “Россия икътисадының энергия нәтиҗәлелеген күтәрү мәсьәләсе”нә багышланган президиум утырышы узды. Утырышта Татарстан Президенты Минтимер Шәймиев тә катнашты.

Утырышта 2020 елда Россия тулаем эчке продуктының энергия сыйдырышлылыгын 40 процентка киметү бурычы куелган иде. Бу максатлар ирешергә яңа “Энергия саклау һәм энергия нәтиҗәлелеген күтәрү турындагы” ФЗ мөмкинлек бирә. Ул РФ Дәүләт Думасы тарафыннан 2008 елның көзендә кабул ителгән иде һәм хәзер икенче укылышка әзерләнә.

“Энергия саклау проблемалары Россия һәм башка илләр өчен төп мәсьәлә булып тора, - дип белдерде журналистларга Минтимер Шәймиев. – Базар шартларында яңа энергия саклаучы технологияләр кертмичә һәм энергия ресурсларына хуҗаларча караш булдырмыйча икътисадны көндәшлеккә ия итү мөмкин түгел”.

Республика Илбашы хәзерге вакытта Татарстанда “Татарстан Республикасында 2006–2010 елларга исәпләнгән энергия ресурслары нәтиҗәлелеге” программасы уңышлы гамәлгә куела, дип билгеләп үтте. Аның сүзләренчә, Россия Президенты РФ Дәүләт Советы утырышында төбәкләр гомумфедераль норматив документларны көтмичә мондый программаларны гамәлгә куя ала, дип ассызыклаган.

“Без дөрес юлда, әгәр энергия нәтиҗәлелеген күтәрү буенча федераль дәрәҗәдәге эшләр тиз гамәлгә куела башлый икән, бу республикада энергия ресурсларын саклау буенча үткәрелә торган чараларның нәтиҗәлелеген күтәрәчәк”, - дип белдерде ТР Президенты.