Казанда 2013 елгы Универсиада объектларының иминлеген тәэмин итү хакында фикер алыштылар

25 июньдә Татарстан Республикасы Министрлар Кабинетында ТР Хөкүмәте башлыгы Рөстәм Миңнеханов Россия Президенты каршындагы физкультура һәм спортны, югары казанышлар спортын үстерү, XXII кышкы Олимпия уеннарына әзерлек һәм аны үткәрү буенча Иминлек советының даими эшче төркеме җитәкчесе Олег Сыромолотов белән очрашты. Очрашуда сүз 2013 елгы Бөтендөнья җәйге студентлар уеннарына төзелүче спорт объектларының иминлеген тәэмин итү мәсьәләләре хакында барды.

24 - 25 июнь көннәрендә Казанда Россия Президенты каршындагы физкультура һәм спортны, югары казанышлар спортын үстерү, XXII кышкы Олимпия уеннарына әзерлек һәм аны үткәрү буенча Иминлек советы даими эшче төркеменең алтынчы утырышы узды, дип хәбәр итте ТР Министрлар Кабинеты аппаратының административ һәм хокук саклау органнары идарәсе башлыгы Александр Вайда. Утырыш барышында эшче төркем әгъзалары шулай ук Татарстан башкаласында 2013 елда узачак Универсиадага әзерлек һәм аны оештыруның барышы белән таныштылар, спорт объектлары торгызыла торган төзелеш мәйданчыкларын карадылар, аларның куркынычсызлык дәрәҗәсен бәяләделәр, дип хәбәр итә ТР Министрлар Кабинетының матбугат хезмәте.