АКШ һәм Татарстан сәүдә-икътисади хезмәттәшлекне үстерәчәк

25 июньдә Казан Кремлендә Татарстан Республикасы Президенты Минтимер Шәймиев Америка Кушма Штатларының Россия Федерациясендәге Гадәттән тыш һәм Тулы вәкаләтле илчесе Джон Байерли белән очрашты.

Очрашу барышында Татарстан һәм АКШ арасында сәүдә-икътисади хезмәттәшлекне киңәйтү, мәгариф һәм фән өлкәсендә үзара бәйләнеш, 2013 елгы Универсиадага әзерлек мәсьәләләре хакында фикер алышынды.

Очрашуда ТР Президенты каршындагы Халыкара мәсьәләләр буенча дәүләт киңәшчесе - Тышкы элемтәләр департаменты директоры Тимур Акулов, ТР сәнәгать һәм сәүдә министры Равил Зарипов, ТР мәгариф һәм фән министры Альберт Гыйльметдинов, Казан мэры Илсур Метшин катнашты.

Очрашуда Минтимер Шәймиев үзенең сәламләү сүзендә билгеләп үткәнчә, АКШ һәм Татарстан арасында сәүдә-икътисади хезмәттәшлекне үстерергә кирәк. Икътисади кризис чорында ихтыяҗны яңарту мөһим мәсьәләләрдән санала. Дөнья икътисады җанланмыйча торып, Татарстан икътисадының җанлануына исәп тотарга ярамый. Республика икътисады экспортка йөз тота, продукциянең 60 процентка якыны чит илләргә чыгарыла.

"ТР Президенты белән әңгәмә бик нәтиҗәле һәм кызыклы булды. Безнең икътисади кризистан бергәләшеп, икътисади һәм сәүдә мөнәсәбәтләрен үстереп чыгачакбыз дигән бердәм килешүебез бар, - дип сөйләде журналистларга Джон Байерли Казан Кремлендә узган очрашудан соң. - Әгәр безнең төбәкләр дәрәҗәсендә мөнәсәбәтләр нык булса, АКШ һәм Россия арасында ныклы мөнәсәбәтләр урнашачак".

Аның сүзләренә караганда, Американың "IBM" һәм "HP" компанияләре Татарстанда инде күптәннән һәм уңышлы эшләп килә, һәм бу нигездә яңа уртак предприятиеләр ачарга кирәк.

Илче билгеләп үткәнчә, аны Татарстанда мәчетләр һәм чиркәүләрнең янәшә урнашуы гаҗәпкә калдырган. Республикада төрле милләт һәм конфессия вәкилләре дус-тату гомер кичерә. Ә дөньяның башка почмакларында иминлекне тәэмин итү өчен мәчетләр һәм чиркәүләрне полиция саклый. "Мин сезнең халыкның толерантлыгы турында күп укыдым. Әмма толерантлыкның тере моделен күрү, әлбәттә, көчле тәэсир итә", - дип белдерде ул.

Тимур Акуловның сүзләренә караганда, узган ел АКШ һәм Татарстан арасындагы тауар әйләнеше 180 миллион доллар тәшкил иткән һәм бу гына җитәрлек түгел. Республика территориясендә Америка капиталы белән 10 уртак предприятие эшли. Яңа уртак предприятиеләр нефть химиясе һәм нефть эшкәртү, шулай ук нанотехнологияләр өлкәсендә төзелергә мөмкин.

Бүген Джон Байерли Казан дәүләт энергетика университетында узачак "Бер телдә сөйләшергә өйрәнәбез" Россия инглиз теле укытучылары милли ассоциациясе конференциясендә катнашыр дип көтелә. Илче шулай ук ТР мөселманнары Диния нәзарәтендә, "Фатыйма" хатын-кызлар иҗтимагый оешмасында булачак. ТР Милли китапханәсендә Америка фәнни һәм белем бирү программаларын тәмамлаучылар белән очрашу узачак.