Фәрит Мөхәммәтшин Россия Федерациясе гражданины паспортларын тапшыру тантанасында катнашты

24 июньдә Татарстан Халыклары йортында ТР Дәүләт Советы рәисе Фәрит Мөхәммәтшин ватандашларыбызга Россия Федерациясе гражданины паспортларын тапшырды. Әлеге чарада шулай ук милли-мәдәни берләшмәләр җитәкчеләре, Татарстан Халыклары ассамблеясе советы башкарма комитеты җитәкчесе Николай Владимиров, Федераль миграция хезмәтенең Татарстан Республикасы буенча идарәсе башлыгы урынбасары Валентина Пахомова катнашты.

Бүген Таҗикстанда, Үзбәкстанда, Украинада, Казахстанда, Әзербәйҗанда туып, Татарстанда яшәүче 9 егет һәм кыз Россия Федерациясе гражданины паспортлы булды.

Фәрит Мөхәммәтшин сүзләренчә, һәр илдә, һәр гаиләдә, балалар балигъ булып, паспорт алу - ул зур һәм әһәмиятле вакыйга. Ул, чит җирләрдә туып, Россиягә - безнең республикага яшәргә килгән балаларга паспорт тапшырырга бик рәхәтләнеп ризалык бирүен белдерде. Спикер хәбәр иткәнчә, Татарстан алар өчен икенче ватанга, зур бер гаиләгә әйләнде.

"Әлеге балалар, паспорт алып, Россия Федерация тарафыннан расланган яңа хокукларга ия булалар, алар хәзер сайлауларда катнаша, шул ук вакытта үз өстенә яңа вазыйфалар һәм җаваплылык та ала, - диде спикер.

"Без үзебезнең милләтләр арасындагы дуслыгыбызны бик кадерләп саклыйбыз. Төрле илләрдән килгән гаиләләрнең балалары бүген паспортлар ала", - дип, Фәрит Мөхәммәтшин һәм, яшьләрне бүгенге зур вакыйга белән котлап, беренче тапкыр паспорт алучыларга аны кадерләп сакларга киңәш итте.