Бөгелмәдә ТР Дәүләт Советы комиссиясенең күчмә утырышы узды

24 июньдә Бөгелмәдә Татарстан Республикасы Дәүләт Советының "Россия гражданнарына - һәркем алырлык һәм уңайлы торак" өстенлекле илкүләм проектын гамәлгә ашыруны контрольдә тоту комиссиясенең күчмә утырышы узды. Утырышта 2009 елда күпфатирлы йортларны ремонтлау программасы хакында фикер алышынды.

Утырыш башланыр алдыннан комиссия рәисе Марат Галиев һәм Бөгелмә муниципаль районы башлыгы Наил Мәһдиев җитәкчелегендәге кунаклар Карабаш бистәсе һәм Бөгелмә шәһәрендәге капиталь ремонт программасына кертелгән берничә йорт белән танышты.

Соңыннан "Һәркем алырлык һәм уңайлы торак" өстенлекле илкүләм проектын гамәлгә ашыруны контрольдә тоту буенча парламент комиссиясе җитәкчесе, ТР Дәүләт Советының икътисад, инвестицияләр һәм эшкуарлык комитеты рәисе Марат Галиев үз хис-кичерешләре белән уртаклашты. "Бүген без күргән йортлар гаҗәпкә калдыра. Бөгелмә ремонтның сыйфаты һәм графикта билгеләнгән эшләрнең төгәл башкарылуы буенча башка шәһәрләр өчен үрнәк булып тора", - дип ассызыклады ул.

Күчмә утырышка шәһәр муниципалитеты бинасында нәтиҗә ясалды. Комиссия әгъзалары ТР төзелеш, архитектура һәм торак-коммуналь хуҗалыгы министры урынбасары Евгений Волковның докладын тыңлады. Аның билгеләп үтүенчә, моннан берничә ел элек күпфатирлы йортларны капиталь төзекләндерүгә 1-1,7 миллиард сум акча тотылган булса, 2008 елда ул - 4,2 миллиард, 2009 елда 10 миллиард сумга җиткән. Бүгенге көндә Татарстанда 2297 йортта ремонт эшләре башланган, бу еллык планның 98 процентын тәшкил итә. 207 йортта ремонт эшләре төгәлләнгән. Барлыгы 5 миллиард 298 миллион сумлык эш башкарылган (гомуми күләмнең 59 проценты). Апас, Актаныш һәм Кайбыч районнарында капиталь төзекләндерү эшләре тулысынча төгәлләнгән. Подряд оешмаларга 3 миллиард 589 миллион сум акча күчерелгән.

Бөгелмә мэры Наил Мәһдиев Бөгелмә муниципаль районындагы эшләрнең торышы хакында сөйләде. Ул хәбәр иткәнчә, шәһәрнең үз төзелеш индустриясе базасы: ике кирпеч заводы һәм тимер-бетон эшләнмәләр заводы бар. 2009 елгы капиталь ремонт программасына кертелгән 146 йортта 2 меңнән артык кеше эшли. Билгеләнгән эшләрнең 51 проценты башкарылган инде. Капиталь ремонт эшләре 2009 елның ноябрендә тулысынча төгәлләнәчәк.