Казанда Татарстан һәм Иваново өлкәсе Хөкүмәтләренең эшче төркеме киңәшмәсе булды

23 июньдә ТР Сәнәгать һәм сәүдә министрлыгында Татарстан һәм Иваново өлкәсе Хөкүмәтләре арасында ТРның нефть химиясе сәнәгате предприятиеләре интеграциясе нигезендә Иваново өлкәсенең текстиль сәнәгатен модернизацияләү мәсьәләсе турындагы килешүне гамәлгә ашыру буенча ведомствоара эшче төркемнең беренче киңәшмәсе булды.

Очрашуда Татарстан Республикасыннан сәнәгать һәм сәүдә министры урынбасары Фәрит Туктаров, ТР Сәнәгать һәм сәүдә министрлыгы бүлекләре җитәкчеләре, "Татнефтехиминвест-холдинг" ААҖ генераль директоры Рафинат Яруллин, "Түбән Кама Нефтехим" ААҖ, "Татнефть" ААҖ, "Ак Барс Банкы" ААҖ, "КР - Барс", "Полиматиз" ЯАҖ предприятиеләре вәкилләре, Иваново өлкәсеннән РФ Хөкүмәте каршындагы Иваново өлкәсе Хөкүмәте вәкиллеге җитәкчесенең беренче урынбасары Олег Гарәфиев, Икътисади үсеш һәм сәүдә департаменты җитәкчесе урынбасары Светлана Дәүләтова, РФ Хөкүмәте каршындагы Иваново өлкәсе Хөкүмәте вәкиллеге җитәкчесенең киңәшчесе Василий Сергеенко, Икътисади үсеш һәм сәүдә департаментының сәнәгать һәм инновацион сәясәт бүлеге консультанты Михаил Казаков катнашты.

Фәрит Туктаров киңәшмәне ачканда ведомствоара эшче төркемнең киңәшмәсе Татарстан белән Иваново өлкәсе арасында имзаланган килешүне гамәлгә ашыруда зур адым булыр дип өметләнүен белдерде.

Искә төшереп үтәбез, 2009 елның 20 маенда губернатор Михаил Мень җитәкчелегендәге Иваново өлкәсе делегациясе Татарстан Республикасына визит ясады. Визит кысаларында ике як ТРның нефть химиясе сәнәгате предприятиеләре интеграциясе нигезендә Иваново өлкәсенең текстиль сәнәгатен модернизацияләү турындагы килешүгә кул куелган иде.

Бүген узган киңәшмәдә катнашучылар ведомствоара эшче төркем составын раслады, анда һәр яктан 8 вәкил кертелде. Татарстан вәкилләре барысы да киңәшмәдә бар иде. Олег Гарәфиев һәм Рафинат Яруллин текстиль-сәнгать кластерын булдыру буенча чаралар программасына карата үз фикерләрен белдерделәр.

Яклар мәгълүмат алмашты һәм янә тәкъдимнәр буенча фикер алышу, уртак проектны гамәлгә ашыру буенча төгәл адымнарны билгеләү өчен августта очрашачаклар.