Балалар йортларында тәрбияләнүчеләргә спорт кирәк-яраклары тапшырылды

23 июньдә Колсәет бистәсендә урнашкан "Кояшкай" балалар җәйге сәламәтләндерү лагерында "Без булдырабыз!" республика хәйрия акциясе кысаларында балаларга спорт кирәк-яраклары тапшырылды. Тантанада ТР Мәгариф министры урынбасары Айрат Зиннуров, шулай ук ТР Яшьләр эшләре, спорт һәм туризм министрлыгы вәкилләре дә катнашты.

"Җәйге лагерьларның инде беренче сменасы тәмамланып килә. Ләкин әле кояшлы көннәр, җәй дәвам итә. Бу - балачак иленең иң матур мизгелләре.

Билгеле инде, республика җитәкчелеге балаларга аеруча зур игътибар бирә. Быелның апрель аенда "Без булдырабыз!" дигән республика хәйрия акциясе старт алган иде. Аның ярдәмендә 120 миллион сумнан артык акча тупланган, шуларның 25 миллионы - акчалата. Әлеге акчалар күпбалалы гаиләләргә, ятимнәргә һәм караучысыз калган балаларга юнәлтелде", - дип билгеләп үтте А.Зиннуров.

ТР Президенты тарафыннан быел республикада Спорт һәм сәламәт яшәү рәвеше елы дип игълан ителгән иде. Шуңа да балаларга, сәламәтлекләрен ныгыту өчен һәм сәламәт яшәү рәвешенә мәхәббәт тәрбияләү йөзеннән, спорт кирәк-яраклары тапшырылды. Әлеге бүләккә бүген Казанның 7 нче, 11 нче интернат-мәктәпләре, Идел буе һәм Киров районы балалар йортлары һәм тәрбиягә авыр бирелүче балалар һәм үсмерләрнең укыту-тәрбия учреждениесе лаек булды. Лаеш районы балалар йортына исә биредә тәрбияләнүче балаларның кул эшләрен сатудан кергән акча тапшырылды.

Бүгенге тантанага балалар үзләре дә буш кул белән килмәгән иде. Чарада катнашучы мәктәпләр үз командаларын тәкъдим итте. Ул гына да түгел, үсмерләр үзләренең спортта да, мәдәни чаралар - җыр-биюләрдә дә осталыкларын күрсәтте. "Кояшкай" лагерындагы бәйрәм бүген төрле уеннар, спорт ярышлары белән үрелеп дәвам итте.