Коеп яуган яңгыр Мәскәү өлкәсе Сабан туенда бәйрәм кәефен бозмады

"Сабантуй таш яуса да узачак!" дигән аксиомага әверелгән хакыйкатьне узган шимбәдә Люберцыда үткән Мәскәү өлкәсе Сабан туе тагын бер мәртәбә раслады.

Рәсми тантанадан соң ук башланган яңгыр халыкның бәйрәм кәефен бозмады. Быелгы Мәскәү өлкәсе Сабан туена Буа районы шефлык күрсәтте. Бәйрәмне оештыручыларга ярдәмгә район башлыгы Рафаэль Әбүзәрев җитәкчелегендәге 100 гә якын кешене вәкил итеп җибәрделәр. Алар үз киңәшләре белән ярдәм итте, төрледән-төрле сувенир продукциясе, китаплар, милли тәм-томнар, пешкән әйберләр куелган ябык павильоннар урнаштырды, бай концерт программасы алып килде. Ә бер атна элек буалылар Люберцы муниципаль районы башлыгы Владимир Ружицкий һәм Мәскәү өлкәсе Төбәк татар милли-мәдәни мохтарияте президенты Фәрит Мохтасаров өчен, аларны район Сабан туена кунакка чакырып, мастер-класс оештырды.

"Буа Сабан туенда хөкем сөргән туганлык, дуслык, бердәмлек атмосферасы, Татарстанда халык традицияләре, милли мәдәнияткә карата сакчыл мөнәсәбәт, тырышып эшли һәм матур итеп ял итә белүләре безне таң калдырды, бүгенге тормышыбызның күп кенә вакыйгаларына яңача карарга мәҗбүр итте", - диде В.Ружицкий.

Сабантуйны ачу тантанасында Мәскәү өлкәсе губернаторы Борис Громовның котлавы укылды. Татарстанның Россия Федерациясендәге вәкаләтле вәкиле Назыйф Мириханов бәйрәмдә катнашучылар һәм кунакларга Татарстан Республикасы Президенты Минтимер Шәймиевнең тәбрикләү хатын ирештерде.

Буа районы башлыгы Рафаэль Әбүзәров, Мәскәү өлкәсенең территориаль берләшмәләр эшләре министры урынбасары Сергей Комаров, Люберцы районы депутатлар Советы рәисе Татьяна Иванова, Сабантуйның попечительләр советы рәисе Фаил Ибәтов, "Татнефть"нең Мәскәү филиалы генераль директоры урынбасары Феликс Ганиев, Мәскәү өлкәсе Төбәк татар милли-мәдәни мохтарияте президенты Фәрит Мохтасаров бәйрәмдә катнашучыларга җылы котлау сүзләре белән мөрәҗәгать итте.

Коеп яуган яңгырга да карамастан, Сабан туенда үткәрелә торган бер генә уен, ярыш-бәйге дә (авыш колгага менү, капчык сугышы, капчык киеп йөгерү, чүлмәк вату, милли көрәш һәм башкалар) онытылып калмады.

Абсолют батыр исемен дәгъвалаучы илледән артык көрәшчедән келәмдә бары тик ике кеше: мәскәүле Максим Афонин һәм карачай Марат Кипкеев калды. Максим Афонин абсолют батыр исемен яулады, аңа "Лада" автомобиле тапшырылды. Әмма Бәдүт Сәйфуллин җитәкчелегендәге судьялар коллегиясе Маратны кыюлыгы өчен бүләкләп, зур гаделлек эшләде. Судьялар Марат Кипкеевка Сабан туендагы иң дәрәҗәле бүләк - тәкә тапшырырга карар кылды.

Мәскәү өлкәсе Сабан туен Наро-Фоминск шәһәре кабул итеп алды: Люберцы районы башлыгы аның вәкилләренә тантаналы төстә бәйрәмнең күчмә символын - бронзадан коелган ат сынын тапшырды.