Яшел Үзәндә Җиңүнең 65 еллыгы уңаеннан тыл хезмәтчәннәре хөрмәтенә һәйкәл куелачак

22 июньдә Яшел Үзәннең Җиңү паркында тантаналы рәвештә нигез ташы салынды, анда 2010 елның 9 маенда Яшел Үзәннең тыл хезмәтчәннәре хөрмәтенә һәйкәл куелачак.

Яшел Үзән районы башлыгына бу инициатива белән районның Ветераннар советы әгъзалары һәм шәһәр җәмәгатьчелеге мөрәҗәгать иткән. Нигез ташы салу тантанасында шәһәр һәм район җитәкчеләре, эре предприятие вәкилләре, идарәләр, көч структуралары җитәкчеләре, ветераннар һәм яшьләр катнашты.

"Бездә сугыш кагылмаган бер гаилә дә юк. Хәзерге безнең өчен халыклар дуслыгы зур кыйммәт булып тора. Бу дуслык, безнең солдатлар һәм тыл хезмәтчәннәре батырлыгы хөрмәтенә һәйкәлгә нигез салабыз", - дип билгеләп үтте бүген таш салу тантанасында Радик Хәсәнов.

Районның Ветераннар советы рәисе Валентина Перфильева, ветеран, сугышта катнашучы Николай Лазарев тантанага җыелган халыкны һәйкәлгә нигез ташы салыну белән котлады. Алар беркайчан да коточкыч сугыш турында онытмаска һәм бу җиңүнең нинди кыйммәт бәягә төшүен истә чыгармаска тиеш, дип белдерде.

Район башлыгы шәһәр һәм район халкын, предприятие, кече һәм урта бизнес субъектлары җитәкчеләрен һәйкәл торгызу өчен акча җыюда актив катнашырга чакырды.

"Сугыш кырларында ятып калучылар һәм тылда эшләп ачтан үлгән кешеләрнең истәлеге күңелләребездә мәңге сакланыр. Ә исәннәргә нык сәламәтлек һәм озын гомер телибез", - дип билгеләп үтте район башлыгы үз чыгышында.

Бүген ТРның атказанган укытучысы, Яшел Үзәндәге 9нчы лицейның Г.К.Жуков исемендәге музей җитәкчесе Әхәт Садриев, Әфганстандагы Сугыш ветераннары советы әгъзасы Андрей Винокуров, "Яшьләр гвардиясе" әгъзасы Алексей Бутусов эзләнү эшчәнлегендә катнашкан өчен район башлыгының Мактаулы грамоталары белән бүләкләнде.