Кувәйт иленнән килгән мөслимәләр Россия Ислам университетында очрашуда булды

Россия Ислам университетында Татарстан мөслимәләренең Кувәйт иленнән килгән делегация вәкилләре белән очрашуы үтте. Исегезгә төшерәбез, бары тик хатын - кызлардан торган әлеге делегация Казанга 18 июнь көнне килгән иде. Алар арасында җәмәгать эшлеклесе, рәссам, мәгариф һәм медицина өлкәсендә эшләүче ханымнар бар. Татарстанга сәфәрләре дәвамында алар республикада яшәүче мөслимә хатын-кызлар белән танышырга теләү ниятен белдерде.

Очрашу Россия Ислам университеты эшчәнлеге белән танышудан башланып китте. Алга таба Татарстан мөслимәләре берлеге рәисе Наилә Җиһаншина аларга оешманың эшчәнлеге турында сөйләп үтте. Татарстанда мөселман хатын-кызларының рухи үсеше өчен, ел саен "Мөслимә туташ" конкурсының үткәрелүен, эш белән тәэмин итү мәсьләләрен хәл ителүе, мөселман гаиләләре арасында аерылышучылар санын киметү максатыннан, психолог һәм юрист киңәшләрен үз эченә алган "Талакка кадәр" проектының эшләве, даими рәвештә югары уку йортлары студентлары белән очрашулар үткәрелүе хакында кунаклар бик кызыксынып тыңлады.

Киләчәктә Казанда спорт зал, конференц зал, чәчтарашханә, ателье, телләр өйрәнү үзәген үз эченә алган "Бәрәкәт" гаилә ял итү үзәген булдыру нияте Кувейт делегациясендә аеруча кызыксыну уятты. Шулай ук Татарстан мөслимәләре берлеге рәисе Наилә Җиһаншина аларны Татарстанда көз көне үтәчәк ислам киемнәрен тегүче дизайнерларның халыкара конкурсында катнашырга чакырды. Очрашу Казанның "Әниләр" мәчетендә бергәләп көндезге намазны уку белән тәмамланды.