Петербург Мариин театрына "Шүрәле" кайтты

Илнең мәдәни үзәге булган Санкт-Петербургта "Шүрәле" балетын яңарту хакында сүз күптән бара иде инде. Хикмәт шунда, төньяк башкалада моннан утыз еллар элек бу әсәр гөрләп барган. Ул һәрчак аншлаг белән үткән.

Соңгы вакытта Татарстан Республикасының Санкт-Петербургтагы даими вәкиллеге (җитәкчесе Шамил Әхмәтшин) бу "эшкә" җитди тотынды. Һәм менә Петербургта яшәүче, Тукай иҗатына мөкиббән киткәннәр зур түземсезлек белән "Шүрәле" премьерасын көтә. Ул 28 июньдә куелачак. Мариин театры баш художество җитәкчесе Валерий Гергиев сүзләренә караганда, бу юнәлештә зур иҗади хезмәт башкарылган. Репетицияләр Сөембикә ролен Мариинкада беренче башкарган таләпчән һәм үтә нәзакәтле хөкемдар Майя Плисецкая күзәтчелегендә барган. Татарның билгеле композиторы Фәрид Яруллин иҗат иткән "Шүрәле"нең тәүге спектакле Казанда 1945 елда куела. Өч өлештән торган сәхнә әсәре Муса Җәлил исемендәге опера һәм балет театрында күрсәтелә. Аннары ул Мәскәү, Ленинград, Киев шәһәрләре, Болгария, Германия, Голландия, Египет, Польша һәм башка илләр сәхнәсенә чыга.