"Сотворение мира"/"Тынычлык булдыру" фестивале мәйданы 4 аерым зонага бүленә

Казанда узган елны 30 август - Татарстан Республикасы һәм Казан шәһәре көнне үткәрелгән "Сотворение мира"/"Тынычлык булдыру" I Халыкара музыка фестивале зур танылу алды һәм 150 меңләп кешене Меңьеллык мәйданына җыйды. Быел исә Казанда II Халыкара фестиваль, мэр Илсур Метшин үтенече буенча, 27 июнь - Яшьләр көнендә булачак.

Бүген "Бәйрәм программалары дирекциясе" башлыгы Игорь Сивов Казан шәһәре Башкарма комитетында үткәрелгән шәһәр җитәкчелегенең "дүшәмбе киңәшмәсе"ндә фестивальга әзерлек буенча ясаган чыгышында хәбәр иткәнчә, фестивальда катнашучылар 25 июнь көнне республика башкаласына килер дип көтелә, ә артистлар барысы да "Корстон" сәүдә-күңел ачу комплексында урнашачак. Икенче көнне 16.00 сәгатьтә "Корстон"да фестивальда катнашучылар белән матбугат конференциясе оештыру да күздә тотыла.

Меңьеллык мәйданында 27сендә 13.00 сәгатьтә әлеге "тере" музыка бәйрәмен Казандагы "The Road" рок-музыка мәктәбе балалары ачып җибәрәчәк, программаны исә Ксения Стриж белән Сева Новгородцев алып барачак, дип игълан итте ул. Фестивальның беренчесен үткәрү тәҗрибәсенә таянып, бу юлы оештыручылар бәйрәм мәйданын 4 аерым зонага бүлүне кулай күргән: тамашачылар өчен гомуми зона, матбугат зонасы, башка шәһәрләрдән килүче кунаклар өчен махсус зона, эчендә инвалидлар өчен аерым мәйданчыгы булган VIP-зона.

Фестивальның финалында төрле жанр, культура вәкилләре һәм дин тарафдарларының уртак музыкаль номеры бәйрәм салюты залпына кушылып башкарылачак, ә салют Меңьеллык мәйданы белән "Парус" рестораны янындагы причалдан җибәреләчәк. "Бу фестивальның икенчесе аеруча уңышлы булачак, форсаттан файдаланып, казанлыларны халыкара музыка бәйрәменә чакырам", - дип мөрәҗәгать итте директор И.Сивов.

Казанлыларның үтенечләрен исәпкә алып, быел Меңьеллык мәйданы 27се көнне сәгать иртәнге 8дән генә транспорт өчен ябыла, дип белдерде ул.