Татарстан башкаласында Сабантуй бәйрәме уза

20 июньдә Татарстан башкаласында татар халкының милли бәйрәме Сабантуй уза. Быел бәйрәмне Совет һәм Идел буе районнарындагы Каенлыкларда һәм Киров районындагы Аккош күлендә бәйрәм итәләр. Төп Сабантуй Аккош күлендәге урман-парк зонасында оештырылды.

Бәйрәм кунаклары арасында ТР Дәүләт Советы Рәисе Фәрит Мөхәммәтшин, ТР Премьер-министры урынбасары - мәдәният министры Зилә Вәлиева, Казан мэры Илсур Метшин, Казанның Киров, Мәскәү һәм Авиатөзелеш районнары хакимият башлыклары, Россия студентлар спорты берлеге президенты Олег Матыцин, Казанның мактаулы гражданины, Россиянең Ислам конференциясе оешмасы каршындагы даими вәкиле Камил Исхаков, республика Дәүләт Советы депутатлары бар иде. Сабантуйда шулай ук чит ил кунаклары - Франция Республикасының Россия Федерациясендәге Гадәттән тыш һәм Тулы вәкаләтле илчесе Жан де Глиниасти, Казанга күчмә утырышка килгән Ислам башкалалары оешмасы вәкилләре, Төркмәнстан Министрлар Кабинеты рәисе урынбасары җитәкчелегендәге Төркмәнстан делегациясе, шулай ук Кувәйт делегациясе катнашты.

Сабантуй кунакларын һәм казанлыларны татар халык җырлары һәм биюләре белән каршы алдылар, аларны "Бәхетле балачак" һәм "Кристалл" ансамбльләре башкарды. Бәйрәмдә шулай ук республика башкаласының башка үзешчән сәнгать коллективлары катнашты. Аккош күлендә узучы бәйрәмнең төп концепциясе әкияти нигезгә корылган, һәр тамаша - үзе аерым бер әкият.

Сабантуйга килгән кунакларны Казан мэры Илсур Метшин сәламләде. "Башкалабыз Сабантуйны якты йөз белән каршы ала. Язгы чәчү эшләре төгәлләнде. Димәк, табыннарыбыз түрендә Татарстан җирендә үстерелгән икмәк булачак", - диде ул. "Республикабызда яшәүчеләр һәрвакытта да хезмәт сөючәнлеге белән аерылып торды", - дип өстәде Илсур Метшин һәм барысына да уңышлар теләп калды.

"Татар халкының милли бәйрәме Сабантуйны бүген Татарстаннан читтәге төбәкләрдә дә зурлап билгеләп үтәләр. Шуны шатланып әйтә алам, Сабантуй Ауропаның кайбер илләрендә дә уздырыла", - диде Дәүләт Советы Рәисе Фәрит Мөхәммәтшин.

Аның фикеренчә, милли бәйрәмне мондый форматта (шәһәрнең өч районы халкы бер мәйданда җыела) үткәрү Казан һәм республикада яшәүчеләрнең дуслык һәм татулык билгесе санала.

"Казан халкының түземлеге, осталыгы һәм хезмәт сөючәнлеге нәтиҗәсендә без икътисади кризистан да исән-имин чыгарбыз", - дип ассызыклады республика парламенты башлыгы.

Бәйрәм татар эстрадасы йолдызы Салават Фәтхетдинов, Россия һәм Татарстанның халык артисты Илһам Шакировның чыгышлары белән дәвам итте.

Бүгенге бәйрәм кысаларында театральләштерелгән тамашалар, спорт ярышлары, традицион аттракционнар уза, көрәшчеләр бил алыша. Моннан тыш, чаралар "Балалар мәйданы", "Кырлай паркы", "Урман кафесы", "Яшьләр мәйданы", "Дөнья халыклары кухнясы", "Җырлап ачыла күңел", "Фольклор мәйданчыгы" һәм башка махсуслаштырылган мәйданчыкларда уза.

Сабантуйның абсолют батырына тәкә һәм "ВАЗ-2114" автомобиле тапшырылачак.