Татарстан волонтерлары Россиядә беренчеләрдән булып махсус кенәгәләр алды

ТР яшьләр эшләре, спорт һәм туристлык министры Марат Бариев Татарстан волонтерларына Россиядә беренчеләрдән булып волонтер кенәгәләре тапшырды.

Кичә Казанда Универсиадада катнашу максаты белән 24 июньдә Белградка юл тотачак Татарстанның 150 волонтеры өчен тренинг узды.

Тренингта катнашучыларга Россиядә беренчеләрдән булып РФ Спорт, туристлык һәм яшьләр сәясәте министрлыгы тарафыннан расланган волонтер кенәгәләре тапшырдылар. Әлеге документ Сочи һәм Татарстан волонтерлары өчен хезмәт кенәгәсенең тиңдәше булачак. Документның тышлыгында Россия гербы белән бергә 2014 елгы Олимпия уеннары һәм 2013 елгы Универсиада логотиплары төшерелгән, дип хәбәр ТР Яшьләр эшләре, спорт һәм туристлык министрлыгының матбугат хезмәте.

Россия спорт, туристлык һәм яшьләр сәясәте министры Виталий Мутко Сочи волонтерларына мондый кенәгәләрне Яшьләр көнендә, 27 июньдә тапшырачак.

Тренинг кысаларында командалар оештырылды (волонтерлар департементларга бүленгән). Волонтерлар команда оештыру буенча махсус психологик тренинг узды һәм сәфәргә чыгу өчен кирәк-ярак алды.