Франция илчесе Татарстанга Россиядә Франция елы чараларында катнашырга тәкъдим итте

ТР Хөкүмәте башлыгы Рөстәм Миңнеханов Татарстан Республикасы Министрлар Кабинетында Франция Республикасының Россия Федерациясендәге Гадәттән тыш һәм Тулы вәкаләтле илчесе Жан де Глиниасти белән очрашты.

Жан де Глиниастины сәламләп, ТР Премьер-министры Франция белән икътисади һәм мәдәни элемтәләрне үстерүгә карата кызыксынуын белдерде.

"Без Татарстанга Франция бизнесы килү, яңа эшлекле элемтәләр урнашу, безнең белгечләр француз коллегаларының тәҗрибәсен үзләшерүгә, шулай ук мәгариф өлкәсендә хезмәттәшлекне үстерүгә карата кызыксыну белдерәбез", - диде Рөстәм Миңнеханов.

Франция технологияләрен җәлеп итеп гамәлгә ашыру ихтималы булган проектлар арасында, ТР Премьер-министры автокомпонентлар җитештерүне үстерү проектын билгеләп үтте.

Ул "Шнайдер Электрик" компаниясе белән (әлеге компания Татарстан территориясендә производство һәм укыту үзәге ачты) ике якка да файдалы мөнәсәбәтләрне чит ил компанияләре белән хезмәттәшлекнең уңай үрнәге дип атады.

Үз чиратында, Франция Республикасының Россия Федерациясендәге Гадәттән тыш һәм Тулы вәкаләтле илчесе Татарстан Премьер-министрын Россиядә - Франция елы (2009) һәм Франциядә Россия елы (2010) кысаларында узачак чараларда катнашырга чакырды.

Глиниасти әфәнде шулай ук Татарстан Республикасына Франциядә реклама ясау, илнең автомобиль җитештерүчеләре һәм бизнес-даирәләренең игътибарын җәлеп итүдә уникаль мөмкинлек буларак, Казанда 2009 елның сентябрендә старт алачак "Ефәк юлы" ("Дакар" сериясе) автораллиен кулланырга тәкъдим итте. Илче искәртеп узганча, раллины үткәрүгә Франциянең A.S.O. компаниясе ("Amaury Sport Organisation" - "Дакар"ны оештыручы) җәлеп ителгән.

Жан де Глиниасти фикеренчә, Татарстан белән хезмәттәшлекнең тагын бер өлкәсе - энергия саклау һәм энергия нәтиҗәлелеге программалары.

Моннан тыш, ул коммуналь хуҗалык белән идарә итү өлкәсендә хезмәт күрсәтүче француз компаниясе хакында сөйләде. Глиниасти әфәнденең сүзләренә караганда, бүген әлеге компания Санкт-Петербургта үзен яхшы яктан күрсәткән инде. Франция Республикасының Россиядәге илчесе Татарстан вәкилләрен коммуналь хезмәтләр һәм шәхси-дәүләт партнерлыгы өлкәсендә идарә итүне оештыру мәсьәләләре буенча Санкт-Петербургта 22 октябрьдә узачак коллоквиумда катнашырга чакырды.

Франция Республикасының Россия Федерациясендәге Гадәттән тыш һәм Тулы вәкаләтле илчесенең Татарстанга визиты кысаларында республика министрлык һәм ведомстволарында очрашулар планлаштырылган. Бүген Глиниасти әфәнде Казанда "Ibis" кунакханәсен ачу тантанасында катнашырга ниятли, дип хәбәр итә ТР Министрлар Кабинетының матбугат хезмәте.