"Ак чәчәкләр" II республика бәйгесенең җиңүчеләре игълан ителде

Якынлашып килүче Медицина хезмәткәрләре көне уңаеннан, "Ак чәчәкләр" II республика бәйгесе Татарстанның сәламәтлек сагында торучыларны "Пирамида" мәдәни-күңел ачу үзәгенә туплады. Бүген биредә конкурсның җиңүчеләре игълан ителде.

Билгеле булганча, быелгы конкурс 7 номинациядә узды. Алар - "Ел табибы", "Уникаль очрак", "Ел медицина хезмәткәре", "Ел җитәкчесе", "Елның иң яхшы даруханәсе", "Авыруларны профилактикалауда инновацион проектлар" һәм "Сәламәтлек саклау өлкәсендәге легендар шәхес" номинацияләре.

Әйтергә кирәк, номинацияләрнең һәрберсендә диярлек 3әр кандидат, "Авыруларны профилактикалауда инновацион проектлар" номинациясендә - 4, "Сәламәтлек саклау өлкәсендәге легендар шәхес"тә - 1 кеше тәкъдим ителгән иде.

Нәтиҗәдә, "Уникаль очрак" номинациясендә 3 кешедән торган төркем - Республика клиник хастахнәсенең Фирая Сабирова җитәкчелегендәге репродукция һәм гаилә үзәге хезмәткәрләре - табиб-гинеколог Татьяна Шадрина һәм табиб-эмбриолог Светлана Корбанова җиңүче дип табылды. "Ел медицина хезмәктәре" номинациясендә Төбәкара клиник-диагностика үзәге дәүләт учреждениесе баш шәфкать туташы Аида Сафина, "Ел җитәкчесе"ендә Әлмәт муниципаль районы Сәламәтлек саклау идарәсе башлыгы Фәрит Җиһаншин, "Елның иң яхшы даруханәсе" номинациясендә Арча районы Яңа Кенәр авылындагы 79 нчы санлы даруханә (җитәкчесе Зөлфия Зыятдинова), "Авыруларны профилактикалауда инновацион проектлар" номинациясендә Яңа Чишмә районы Үзәк район хастаханәсе (баш табибы - Ришат Билалов) бүләкләнде.

"Сәламәтлек саклау өлкәсендәге легендар шәхес" исеме исә Казан дәүләт медицина университетының биохимия кафедрасы профессоры Диләвер Зөбәеровка бирелде.

Бәйгедә катнашучыларга дипломнар һәм бүләкләр тапшырылды, "Ел медицина хезмәктәре" һәм "Авыруларны профилактикалауда инновацион проектлар" номинацияләрдә җиңү яулаучыларга чит илдә стажировка узу мөмкинлеге бирелде.