Казан Универсиадага, өстәмә рәвештә, 1 меңнән артык белгеч әзерләргә тиеш

2013 елда Казанда Универсиада үткәрү өчен, Казан шәһәре хакимияте һәм ТР Мәгариф һәм фән министрлыгы белән берлектә, инглиз телен, икътисад нигезләрен һ.б. юнәлешләрне белгән компетентлы кадрларга ихтыяҗ өйрәнелеп, әзер белгечләргә өстәп, хәзерге вакытта төрле юнәлештәге 1152 белгечкә кытлык булуы беленгән. Аерым алганда, биредә кунакханә, ресторан бизнесларыннан кала, су белән тәэмин итү, техник һәм гидротехник корылмаларны гамәлдә куллану, физик культура һәм спорт, туризм, кино һәм телевидение режиссурасы һ.б. буенча югары квалификацияле һәм киңкырлы белгечләр турында сүз бара.

Шул хакта ачыклык керткән ТР мәгариф һәм фән министры урынбасары Андрей Поминов сүзләренчә, ихтыяҗ булган барлык юнәлешләр буенча да республикада белгечләр әзерләү мөмкинлеге бар. Һөнәри әзерлек буенча Татарстан җитәкчелеге исеменнән РФ Мәгариф һәм фән министрлыгына югары уку йортларына бюджет урыннарына өстәмә рәвештә абитуриентлар алуны рөхсәт итүләрен сорап заявка җибәрелгән. Нәтиҗәдә, бакалавриат программасы буенча кабул итү күләме 150 урынга арттырылган.

Моннан тыш, соңгы 2 елны Татарстанның "Алгарыш" программасы гранты буенча спорт өлкәсендә белгеч-тренерлар әзерләү һәм яңадан әзерләү эше гамәлдә. Аның буенча Россия һәм чит илләрнең әйдәп баручы мәгариф үзәкләрендә 54 белгеч әзерлек узган. Әйтик, узган елны хоккей тренерлары чит илләрдә белем эстәргә җибәрелгән булса, быелдан шушы грант буенча 5 топ-менеджер АКШ университетларына җибәреләчәк, баскетбол, футбол тренерлары шушы ук программа буенча һөнәри осталыкларын чит илләрдә чарлаячак, өстәп, ТР Яшьләр эшләре, спорт һәм туризм буенча министрлык волонтерлар әзерли. Болардан кала, тел белгечләре әзерләү дә көн кадагындагы мәсьәлә булып тора. Булган белгечләрне исә Бөтендөнья спорт уеннары таләпләренә туры китереп яңадан әзерләү зарур, чөнки төп таләп - инглиз телен яхшы үзләштерү. Бу юнәлеш, министр урынбасары сүзләренчә, әлегә финансланмаса да, "Алгарыш" программасы буенча кадрлар әзерләү һәм яңадан әзерләү өчен соңгы 2 елда 15 млн. сум акча бүлеп бирелгән.

Бүген Универсиадага кадрлар әзерләү мәсьәләсе буенча "Татмедиа" агентлыгында үткәрелгән матбугат конференциясендә әнә шул хакта сүз барды. Журналистлар белән очрашуга тагын Татар дәүләт гуманитар-педагогика университетының чит ил телләре институты директоры Аида Садыйкова, шул ук университет базасында сәләтле яшьләр белән эшли торган республика лингвистик әзерлек үзәге директоры Марина Солнышкина һәм "Premium English" инглиз теле мәктәбен гамәлгә куючы Стив Мотт килгән иде. Алар исә Казанда инглиз телен өйрәнү мөмкинлекләре турында аңлатма бирде.