Милләттәшләребез яшәгән төбәкләрдәге Сабантуйларга баралар

Бу атна азагында Башкортстан вәкилләре күрше төбәкләрдә үтәчәк Сабантуй бәйрәмнәренә бара.

Бүген Башкортстан татарлары белән башкортлары, Төмән өлкәсендә үтәчәк сабантуйга китте. Милли бәйрәмебез анда иртәгә оештырыла.

Моңа кадәр якташларыбыз өч төркемгә бүленеп, күрше Чиләбе, Свердловск өлкәләрендә һәм Пермь краенда оештырылган милли бәйрәмебезгә барды һәм андагы чараларда актив катнашып кайтты.

Соңгы елларда милли бәйрәмебезне чит төбәкләрдә яшәүче милләттәшләребез белән бергәләп үткәрү, аларга рухи күчтәнәчләр алып бару матур гадәткә әверелде. Быел да шул йолага тугры калырга булды Башкортстан татарлары белән башкортлары.

Төмән өлкәсендә, күрше Пермь краенда, Чиләбе һәм Свердловск өлкәләрендә милли диаспоралар арасында халык саны буенча татарлар беренче, аннан кала башкортлар икенче урынны биләп тора. Төбәкләр арасында төзелгән килешүләр нигезендә, хәзер милли-мәдәни чараларны оештыруга җирле хакимиятләр дә булыша. Башкортстаннан барган сәнгать осталары исә читтә яшәүче татар-башкортларга җыр-моңнарыбызны, биюләребезне алып барып күрсәтә һәм тыңлата. Төрле бәйгеләр оештыруда да Башкортстаннан барган кунаклар мәйдан уртасында була.

БР Мәдәният һәм милли сәясәт министрлыгы җитәкчеләре сүзләренчә, быел да Башкортстаннан барган вәкилләр күршедәге төбәкләрдә гомер кичергән, милли җыр-моңнарыбызга сусаган милләттәшләребез белән рәхәтләнеп аралашып кайтачак. Сәнгать осталары белән бергә күршеләр Сабантуйларына милли оешмалар вәкилләре, галимнәр һәм әдипләр дә бара. Күчтәнәчкә китаплар, вакытлы матбугат басмалары һәм җырлар альбомнары да ала якташларыбыз.