Ленинград өлкәсе Тосно татарлары Сабантуйга җыела

Ленинград өлкәсе Тосно шәһәрендә Сабантуй 20 июньдә үтәчәк. Халкыбызның олы бәйрәме Сабантуйга тоснолылар һәрвакыттагыча киң колач белән әзерләнә. Ул быел Ленинград өлкәсе Нестеров елгасы буенда узачак.

Олы милли тантананы оештыру зур осталык һәм матди чыгымнар таләп итә. Шунлыктан өлкәдәге татар җәмгыятьләреннән бары тик Иниятулла Кутуев җитәкләгән "Изге юл" гына бу чараны оештырырга җөрьәт итә. Хакыйкать хакына әйтергә кирәк, Иниятулла Гани улы борынгы заманнардан биредә яшәгән милләттәшләр йөрәгендә сакланган изге хатирәләрне, гореф-гадәтләрне яңарту, туган моңнарны искә төшерү буенча бик зур эш алып бара. "Изге юл"да Габдулла Тукай һәм Муса Җәлилгә багышланган кичәләр елның-елында зур оешканлык белән үтә. Тосно Татар җәмгыяте "Изге юл" 1997 елның 11 сентябрендә теркәлгән. Аны оештыруда Миргасыйм Баһаветдинов (Татарстан), Раил Габбәсов (Башкортостан), Нурия Бикҗанова (касыйм татарларыннан), Иниятулла Кутуев һәм Мирхәйдәр Имешев ( Мордовия) башлап йөри. Җәмгыять үз алдына туган телне яңарту, татар халкы аңында рухи-әхлакый торышны тудыру, милләтара һәм диниара мөнәсәбәтләр мәдәниятен тәрбияләүне максат итеп куйган. Тосно татарлары оештырган Сабантуйда Татарстан Республикасының Санкт-Петербург һәм Ленинград өлкәсендәге даими вәкиле Шамил Әхмәтшинның катнашуы көтелә.