Фәрит Мөхәммәтшин: "Ирекле дружиналар оештыруда халыкның үзенең катнашуы кыйммәт"

17 июньдә ТР Дәүләт Советының Законлылык һәм хокук тәртибе комитеты үзенең күчмә утырышын республиканың Яшел Үзән районында уздырды. Утырышның көн тәртибенә чыгарылган төп мәсьәлә Яшел Үзән, Лаеш, Югары Ослан һәм Биектау муниципаль районнарында хокук бозуларга каршы профилактика алып бару белән бәйле законнарны тормышка ашыруга багышланган иде. Комитет рәисе урынбасары Рафил Ногманов берничә эшче төркеме белән берлектә әлеге районнардагы хәлне өйрәнгән.

Комитет утырышында ТР Дәүләт Советы рәисе Фәрит Мөхәммәтшин да катнашып, республикада җинаятьчелеккә һәм хокук бозуларга каршы эш алып бару өчен субъект вәкаләтләре кысаларында законнар базасы төзелүен, әмма аларны тормышка ашыруның җитәрлек дәрәҗәдә булмавын ассызыклап үтте. "Профилактика - ул җинаятьчелек белән көрәшүдә беренче баскыч, ә җинаятьчелекне киметү - бик мөһим этап. Минем фикеремчә, законлылык комитеты да, муниципаль хакимият тә моңа аерата игътибар бирергә тиеш. Әлеге эшнең зарурлыгына карата ваемсызлык булырга тиеш түгел", - диде спикер.

Татарстан парламенты башлыгы сүзләренчә, бу юнәлештә эшләү юллары билгеле: бары тик республика дәрәҗәсендә кабул ителгән законнарны һәм карарларны үтәргә генә кирәк. "Әгәр ныклап уйлансаң, балигъ булмаганнар арасында җинаятьчелек һәм хокук бозулар мәсьәләсе халыкны да, хокук саклау органнарын да борчырга тиеш", - диде ул.

Фәрит Мөхәммәтшин республиканың Югары Ослан районында җинаятьчелекнең 25 процентка артуын искәртеп, монда милицияне генә гаепләп булмавын, көрәшне бергәләп алып барырга кирәклеген белдерде. Аның фикеренчә, ирекле халык дружиналары оештыру, аларга халыкны күпләп җәлеп итү җинаятьчелек белән бәйле вәзгыятьне бераз "йомшартырга" мөмкинлек бирер иде.

Әлегә урыннарда дружиналарның кирәклеген аңлап бетерү җитми. "Без аларга автомат алып, бандитлар тотарга кушмыйбыз бит. Сүз профилактика эше турында", - диде спикер һәм киләчәк турында уйланган җитәкчеләргә хезмәт коллективларыннан мөмкин кадәр күбрәк хезмәткәрләрен халык дружиналарына җибәрергә чакырды. "Бу эштә халыкның үзенең катнашуы кыйммәт. Ирекле халык дружиналарын оештыру - мәҗбүри чара", - диде Ф.Мөхәммәтшин.

Утырышта катнашучылар "Татарстан Республикасында җәмәгать тәртибен тәэмин итүдә гражданнарның катнашуы турында" республика законында халык дружиначыларын тәртип саклау вакытында яклау һәм аларга ташламалар бирү мәсьәләсен күтәрде. Спикер моңа җавап итеп урыннардан кергән тәкъдимнәрне карарга әзер булуын белдерде.

Фәрит Мөхәммәтшин федераль дәрәҗәдә яшүсмерләрнең кичен җәмәгать урыннарында йөрүен чикләү белән бәйле закон кабул ителүен, бу нисбәттән субъектларга үз чикләүләрен кертергә мөмкинлек калдыруларын әйтте. "Республика дәрәҗәсендә мондый законны көзгә кадәр кабул итәргә кирәк", - диде ул. Спикер сүзләренчә, әлеге юнәлештә муниципаль берәмлекләр киңәшләшү зарур. "Яшүсмерләр, кулына сыра тотып, урамда йөрмәсен. Безнең ваемсызлыгыбыз аларны җавапсызлыкка этәрә", - диде парламент башлыгы.

Фәрит Мөхәммәтшин Яшел Үзән, Лаеш, Югары Ослан һәм Биектау муниципаль районнарында хокук бозуларга каршы профилактика алып баруга кагылышлы материалларны муниципалитетларга җибәрергә һәм район советлары утырышларында тикшерергә тәкъдим итте. "Урыннардагы вәзгыятьтән чыгып, өстәмә чаралар эшләргә кирәк", - дип ул, район җитәкчеләрен хокук бозу һәм җинаятьчелек белән бәйле проблемаларны хәл иткәндә, бөтен мөмкинлекләрне дә файдаланырга чакырды.