Ф. Мөхәммәтшин РФ судьяларының Казанда узучы квалификацион коллегиясендә катнашты

16 июньдә Казанда Россия Федерациясе судьяларының квалификацион коллегиясе уза. Аның эшендә ТР Дәүләт Советы рәисе Фәрит Мөхәммәтшин, ТР Югары суды рәисе Геннадий Баранов та катнашты.

Утырышта коллегия рәисе Валентин Кузнецов билгеләп үткәнчә, коллегиянең күчмә утырышлары моңарчы Владивостокта, Мурманскта, Ростовта, Алтайда һәм Мәскәүдә узган. "Коллегияләрнең төбәкләрдә узуы безгә аларны нәрсә борчуын ачыкларга, чыгарган карарларыбызның дәлилле һәм дөрес булуына ярдәм итә", - диде В.Кузнецов. Һәм утырышларны кайсы төбәктә уздыру турындагы карарны коллегия әгъзаларының күмәк тавыш бирүе нәтиҗәсендә кабул итүләрен хәбәр итте.

Спикер Фәрит Мөхәммәтшин чираттагы коллегияне уздыру урыны итеп Казанны сайлап алуларына рәхмәт белдереп: "Бу безнең өчен принципиаль яктан бик мөһим, моннан бик күп файда алабыз", - дип билгеләп үтте. ТР парламенты башлыгы сүзләренчә, Россиянең Татарстан территориясендә эшләүче судлар җитәкчеләре белән ике арада принципиаль һәм ышанычлы мөнәсәбәтләр урнашкан.

Фәрит Мөхәммәтшин бүгенге утырышта Россия Федерациясе судьяларының квалификацион коллегиясен "калкан һәм кылыч" итеп күз алдына китерүен әйтте. "Кылыч - кайвакытта үз эшенә карата гадел һәм таләпчән булмаучыларга, ә калкан - бөтен суд җәмәгатьчелеген гәүдәләндерә, аерым судьяларны һәм Россия Федерациясе суд хакимияте абруен яклау өчен", - диде ул.

Татарстан парламенты башлыгы республиканың икътисади кризис шартларындагы эшчәнлегенә тукталып, хәзерге вакытта федераль үзәк белән берлектә әлеге кризисның нәтиҗәләрен киметү өстендә эшләүләрен билгеләп үтте. Татарстанның агымдагы ел бюджетына кертелгән үзгәрешләр белән таныштырды. Кризисның 2013 елда узачак бөтендөнья җәйге Универсиадага "китереп сукса" да, республиканың аны үткәрү ниятеннән кайтырга җыенмавын да белдерде.

Фәрит Мөхәммәтшин сүзләренчә, Татарстанда Конституция, Югары һәм Арбитраж судлар эшли, җәмәгать судьялары институты ныгып килә: судлар ярдәмендә үз проблемаларын чишүче халыкта тагын да ышаныч уята.

Спикер үз чыгышында соңгы арада россиялеләрнең Кеше хокуклары буенча Европа судына мөрәҗәгать итүләрнең артуы борчылу тудыруын, бу вәзгыятькә анализ ясарга кирәклеген, ашыгып нәтиҗә ясарга ярамаганлыгын белдерде. Спикер коллегиядә катнашучыларны ТР Югары судының яңа бинасын ачу тантанасына чакырып, республикада суд органнары эшчәнлеге өчен тиешле шартлар тудырылуын хәбәр итте.