Фәрит Мөхәммәтшин РФ Үзәк сайлау комиссиясе рәисе урынбасары Леонид Ивлев белән очрашты

4 июньдә Татарстан Республикасы Дәүләт Советы рәисе Фәрит Мөхәммәтшин Россия Федерациясе Үзәк сайлау комиссиясе рәисе урынбасары Леонид Ивлев белән очрашты. Леонид Ивлев Казанга Россия Федерациясенең Идел буе федераль округына керүче сайлау комиссияләре җитәкчеләре киңәшмәсендә катнашу өчен килде.

Спикер Фәрит Мөхәммәтшин Л.Ивлевны Татарстандагы икътисади, сәяси-иҗтимагый вәзгыять белән кыскача гына таныштырып узды. "Бездә халык - студентлар, эшчеләр һәм фәнни җәмәгатьчелек актив рәвештә сайлауларга йөри. Бигрәк тә Казан кебек зур шәһәрләрдә", - диде парламент башлыгы. Аның сүзләренчә, әлегә республика да реаль күппартиялелек бар дип әйтеп булмый.

Фәрит Мөхәммәтшин очрашуда катнашучыларга ТР Дәүләт Советына "Бердәм Россия" һәм КПРФ партияләре узуын, парламентның тулы көченә эшләвен билгеләп үтте. Һәм хәзерге вакытта бөтен игътибарны кризисның нәтиҗәләрен мөмкин кадәр киметүгә нисбәтле чараларга юнәлтергә кирәклеген ассызыклады.

Россия Федерациясе Үзәк сайлау комиссиясе рәисе урынбасары Леонид Ивлев сүз алып, быел РФ Үзәк сайлау комиссиясенең эш планы нигезендә, федераль округлар буенча үзәк сайлау комиссияләре рәисләре өчен беренче тапкыр семинарлар уздырылуын хәбәр итте. Аның сүзләренчә, мондый семинарлар Көньяк, Төньяк, Үзәк федераль округларда үтте. "Без иртәгә Казанда Идел буе федераль округы масштабындагы эшне башлыйбыз. Бу семинарлар ни өчен кирәк соң? РФ Президенты Дмитрий Анатольевич Медведев узган ел Федераль Җыенга Юлламасын җиткергәннән соң, сайлауларга кагылышлы федераль законнарга җитди үзгәрешләр керде. Бу үзгәрешләр турында фикер алышып, аларны тормышка ашыру буенча уртак чаралар күрергә кирәк. Аннан соң безгә сайлау комиссияләре тәҗрибәсе, яңа барлыкка килә торган "кара" технологияләргә каршы тору турында да фикер алышу зарур. Без, шулай итеп, 2011 елда - РФ Дәүләт Думасына, 2012 елда РФ Президентын сайлауларга әзерлек алып барабыз", - диде Л.Ивлев.

Казанда узачак семинарда Идел буе федераль округына кергән субъектларның 14 сайлау комиссиясе җитәкчеләре, РФ Президентының Идел буе федераль округында Вәкиле вәкилләре, РФ Дәүләт Думасындагы 4 партия әгъзалары да катнашачак. "Сайлау комиссиясе - сәяси партияләрнең союзнигы. Ә алар үзләренең мөнәсәбәтләрен нәкъ менә сайлаулар вакытында ачыклый башлый", - дип белдерде Россия Федерациясе Үзәк сайлау комиссиясе рәисе урынбасары.

"Ни өчен семинар Казанда уза дигәндә, аның матур шәһәр булуы аркасында түгел, без киңәшмәләрне федерацияләрнең сайлау комиссияләре эшчәнлеге үрнәк булган субъектларда үткәрәбез. Ә Татарстан Республикасы Сайлау комиссиясе үрнәгендә башка күрше төбәкләрнең сайлау комиссияләре җитәкчеләре дә эшкә өйрәнә алыр иде", - диде Леонид Ивлев.

Очрашуда шулай ук Татарстан ягыннан - ТР Дәүләт Советы рәисе урынбасарлары Александр Гусев һәм Римма Ратникова, ТР Үзәк сайлау комиссиясе рәисе Анатолий Фомин, парламентның Дәүләт корылышы һәм җирле үзидарә комитеты рәисе Валентина Липужина, ТР Дәүләт Советының Хокук идарәсе башлыгы Андрей Ощепков, РФ Үзәк сайлау комиссиясе ягыннан - сайлау комиссиясе секретаре Николай Конкин, комиссия әгъзалары катнашты.