Фәрит Мөхәммәтшин ТЮРКСОЙ генераль директоры белән очрашты

4 июнь ТР Дәүләт Советы Рәисе Фәрит Мөхәммәтшин ТЮРКСОЙ Халыкара оешмасы генераль директоры Дюсен Касеинов белән очрашты.

Очрашу барышында ТР парламенты башлыгы ТЮРКСОЙ Халыкара оешмасының илләр һәм халыкларның төбәк хезмәттәшлеген үстерүдәге зур ролен билгеләп үтте. Аерым алганда, кичә Казанда ачылган төрки халыкларның "Нәүрүз" IX Халыкара театр фестивале театрлар арасындагы элемтәләрне ныгыту белән бергә, төрки халыклар театрларының дөньядагы театр процессына интеграцияләнүенә дә ярдәм итә.

"Татарстан Республикасы җитәкчелеге инициативасы белән 1998 елда үткәрелә башлаган фестиваль, быел, кризиска да карамастан, анда күп санлы тетар коллективларының катнашуы белән куандырды, - дип ассызыклады Дюсен Касеинов. - Фестивальдә Россия төбәкләре һәм чит илләрдән 13 театр коллективы катнаша".

Фәрит Мөхәммәтшин очрашуда катнашучыларның игътибарын ТЮРКСОЙ Халыкара оешмасы кысаларында халыклар арасында дуслык һәм хезмәттәшлекне ныгыту буенча эзлекле һәм максатчан эшне дәвам итү, төрки илләрнең гуманитар өлкәдә үзара мөнәсәбәтләрен активлаштыру кирәклегенә юнәлтте.

Очрашуда шулай ук ТЮРКСОЙ Халыкара оешмасында катнашучыларның санын арттыру перспективалары, якын киләчәктә Татарстан Республикасы һәм ТЮРКСОЙ арасындагы хезмәттәшлек планнары хакында фикер алышынды, дип хәбәр итә парламентның матбугат хезмәте.

Очрашуда ТР Премьер-министры урынбасары - мәдәният министры Зилә Вәлиева, ТР Дәүләт Советының мәдәният, фән, мәгариф һәм милли мәсьәләләр комитеты рәисе Разил Вәлиев катнашты.