Санкт-Петербургта Халыкара икътисади форум ачыла

4 июньдә Санкт-Петербургта XIII Халыкара икътисади форум ачыла. Анда әйдәп баручы сәясәтчеләр һәм икътисадчылар җыелачак. Форумда Татарстан делегациясе дә катнаша.

Форум дөнья үсешендәге хәзерге этапның актуаль мәсьәләләренә багышланган. Форумда катнашучылар Халыкара финанс институтларының киләчәген аңлауда яңа алымнар, банк секторының үсеш перспективалары, Хөкүмәт тарафыннан күрелүче чараларның нәтиҗәлелеге һәм башка темалар хакында фикер алышачак. Россиянең әлеге мәсьәләләрне хәл итүдәге роленә аерым игътибар бирелер дип көтелә.

Форум кысаларында РФ Президенты Дмитрий Медведев әйдәп баручы Халыкара компанияләрнең җитәкчеләре белән очрашачак, дип хәбәр итә "Интерфакс".

РФ икътисади үсеш министры Эльвира Нәбиуллина хәбәр иткәнчә, 5 июньдә форум кысаларында - "икътисади" көн, ә 6 июньдә "финанс" көне чараларын үткәрү планлаштырылган.

Халыкара икътисади форум барышында Петербургның 5 меңгә якын милиционеры тәртип саклаячак. Моннан тыш, аларга Россиянең башка төбәкләреннән килгән хезмәттәшләре ярдәм итәчәк. Бу вакытта "Ленэкспо" комплексы урнашкан Васильев утравы милициянең төп игътибар зонасы булыр дип көтелә, форумның төп чаралары шунда узачак. Транспорт магистральләренә дә аерым игътибар бирү күздә тотыла.

Легендар "Duran Duran" төркеме һәм җырчы "Anastacia"нең концерты форумның беренче көнендә төп мәдәни вакыйгаларның берсе булачак. Петербург Халыкара икътисади форумы кысаларында Сарай мәйданында бушлай концерт бирү инде күркәм традициягә әверелде. Шулай ук шәһәрнең Мариин, Александрин, Михайлов театрлары, филармония һәм башка әйдәп баручы мәдәни мәйданчыклары да үз программаларын тәкъдим итәчәк.

Форумның эшен дөньяның 27 иленнән килгән журналистлар яктыртачак, дип хәбәр итә "Вести" телеканалы.