Казанда беренче тапкыр төнге фотокросс була

5 июнь көнне сәгать кичке 10да Казандагы Мулланур Вахитов һәйкәле яныннан "Төнге күренеш"/"Ночное видение" дип аталган төнге клуб фотокроссы старт алачак. Аны Goрarty.ru сайты, Татарстанның яшь фотографлары берлеге һәм Казан фотокроссы оештыра.

Традицион фотокросс кагыйдәләреннән ялыккан, бу өлкәдә яңа тәэсирләргә һәм иреккә омтылганнар өчен "Төнге күренеш" үзенчәлекле һәм кызыклы булачак, дип игълан итәләр оештыручылар. Моның өчен 2шәр кешедән торган командалар Казан клубларына фотоауга чыга. Ләкин моның өчен старт алдыннан һәр командага берничә тема тәкъдим ителә, шуларның 5се - мәҗбүри. Шушы темаларның һәркайсына клубта кимендә 1 фото төшерергә тиеш, командалар исә фотокросста катнашкан теләсә кайсы клубка тоткарлыксыз керә ала.

Билгеләнгән тема буенча әзер фотографияләрне исә go@goparty.ru электрон адрес буенча икенче көннең, ягъни 6 июнь сәгать кичке 5кә кадәр җибәрергә кирәк була. Алар өчен тавыш бирү 2 этаптан тора: югарыда әйтелгән сайтта теркәлү узган теләсә кем фотолары буенча финалистлар сайлап алуда катнаша, аннары алар арасыннан профессиональ жюри җиңүчене сайлый. Фотокросста җиңүчегә 5 мең сум акчага сертификат бирелә. Төп приздан кала, тагын махсус номинация дә каралган, ләкин оештыручылар аны әлегә сер итеп саклый.

Фотокросста катнашырга теләгәннәрдән 18 яше тулганнары гына, хәзердән үк, go@goparty.ru адресы буенча заявка бирә ала. Ләкин катнашучы команданың исемен дә туры килгән темасы буенча алдарак әйтелгән сайтта 5 июнь сәгать кичке 8гә кадәр теркәү зарур. Шул ук көнне Мулланур Вахитов һәйкәле янында сәгать кичке 9да (стартка кадәр 1 сәгать алдарак) регистрация узу, шуның өчен алдан бирелгән заявка белән 150 сум, ә алдан заявка бирелмәгән очракта 200 сум взнос түләү шарт.

Казан мэриясеннән алынган мәгълүматта әйтелгәнчә, катнашу теләге белдереп заявка биргәндә команданың исеме, аның составы, элемтәгә керү өчен телефон, e-mail һ.б. виртуаль адрес калдыру таләп ителә.