"Түбән Кама нефтехим" нәтиҗәле эшләвен һәм үсүен дәвам итә

Россиянең эре предприятиеләренең берсе булган "Түбән Кама нефтехим", катлаулы чорга да карамастан, бүген нәтиҗәле эшләвен һәм үсүен дәвам итә. Компания акционерларының еллык гомуми җыелышында чыгыш ясаган ТР Премьер-министры Рөстәм Миңнеханов шулай дип белдерде.

Хөкүмәт башлыгы 2008 елның икътисадның күпчелек тармаклары өчен уңышлы ел булуын, әмма ел ахырында хәлнең тамырдан үзгәрүен билгеләп үтте. Татарстан кебек экспортка йөз тоткан предприятиеләре булган төбәкләр кризисның йогынтысын аеруча нык сизде. Шушындый катлаулы шартларда да республикада 2008 ел ахырына тулай төбәк продукты күләме 930 млрд. сумлык булган. Аның үсеше, 2007 ел белән чагыштырганда, 7,1 процент тәшкил итә. Бу үсешне тәэмин итүгә республиканың нефть химиясе тармагы саллы өлеш керткән. "Татарстан Россиянең нефть химиясе өлкәсендә лидеры. Республика илнең полиэтилен, полипропилен, шиннар базарында әйдәп баручы ролендә. Россиядәге полистирол пластикның 70 проценттан артыгы Түбән Кама предприятиесендә җитештерелә", - ди Хөкүмәт башлыгы.

Рөстәм Миңнеханов сүзләренә караганда, "Түбән Кама нефтехим" конкурентлы продукция җитештерергә сәләтле. Бүген барысы да базарда продукциягә сорау булуга һәм икътисадның кризистан кайчан чыгуына бәйле булачак. Валюта курсында аермалар барлыкка килүгә карамастан, Түбән Кама предприятиесе табышка эшли алган. 1999 елдан бирле биредә 45,8 млрд. сумлык капитал салулар үзләштерелгән, Бу, елына уртача 4,6 млрд. сумнан артык дигән сүз. "Әгәр бу капитал салулар булмаса, биредә бүген яңа продукция чыгарып булмас иде", - ди Рөстәм Миңнеханов.

"Түбән Кама нефтехим" барлык дәрәҗәдәге бюджетларга зур салымнар түләүче, 20 меңнән артык кешене эш урыннары белән тәэмин итүче, кече һәм урта бизнеска ярдәм итүче дә. Рөстәм Миңнеханов искәртүенчә, Кама Аланы территориясендә технопарк төзү мәсьәләсе республикада җитештерелгән полимерларның кимендә 30 процентын үзебездә эшкәртү бурычы куелуга бәйле. Премьер белдерүенчә, бу технопаркны төзү яңа эш урыннары булдыру аша кече бизнесны үстерүгә, алга таба полимерларны эшкәртү күләмен арттыруга ярдәм итәргә тиеш. "Түбән Кама нефтехим" федераль һәм республика бюджетлары белән берлектә бүген бу бурычны чишүгә алынган.