Башкортстанда татар милли-мәдәни мохтариятен төзү җыены үтәчәк

Башкортстан татар милли оешмалары җитәкчеләре чираттагы киңәшмәсен үткәрде.

Әлеге сөйләшүдә шушы атнаның шимбәсендә Уфада үтәчәк Башкортстан татарлары җыенына әзерлек мәсьәләләре тикшерелде.

Утырышта әйтелүенчә, Уфада узачак җыенда төп мәсьәлә булып Башкортстан Татар милли-мәдәни мохтарияте эшчәнлеген рәсмиләштерү каралачак. Шушы мохтариятне оештыру корылтае сыйфатында булачак бу җыен.

Утырышта төп сүзне алып чыгыш ясаган танылган җәмәгать эшлеклесе Рамил Бигнов әйтүенчә, Уфада һәм Кушнаренко белән Благовещен районнарында татар милли-мәдәни мохтариятләре төзелгән дә инде. Алардан 6 июньдә үтәчәк җыенга делегатлар сайланган. Ә җәмгысе бар республика буенча бу шимбәдә үтәчәк корылтайга 110 кеше вәкил булып килә.

Рамил Бигнов татар оешмалары җыенына бина алу мәсьәләсендә тагын проблемалар килеп тууын әйтте. Аның сүзләренчә, хакимиятләр башта моңа ризалык биргән. Әмма хәзер кайсы гына мәдәният сараена мөрәҗәгать итсәләр дә, төрле сәбәпләр табып, бина бирмәүне хуп күрәләр икән.

"Ә кайбер биналар хуҗалары турыдан-туры рәсми хакимиятләрдән куркуларын әйтә", - диде шушы корылтайны үткәрү комитеты җитәкчесе, профессор Мәҗит Хуҗин.

Шушы шартларда киңәшмәдә катнашучылар республика татар милли-мәдәни мохтариятен төзү җыенын Рамил Бигнов тарафыннан татар гимназиясе өчен дип тапшырылган һәм соңрак хакимиятләр тарафыннан җимертелгән бина янәшәсендә, ачык һавада үткәрергә килеште.

Киңәшмәдә җыенга соңгы әзерлек эшләре тикшерелде, чыгыш ясаячак кешеләр тәгаенләнде. Конференциягә Казаннан да кунаклар чакырылуы турында әйтелде.

Әлеге җыен барышында Башкортстан Татар иҗтимагый үзәге төзелүнең 20 еллыгы да бәйрәм ителәчәк. Анда милли хәрәкәттә актив катнашучыларны бүләкләү тантанасы да үтәчәк.