РФ Президентының Эшләр идарәсенә ике Ту-214 самолеты тапшырылды

1 июнь көнне Казан предприятиесенең очу-сынаулар үткәрү полигонында РФ Президентының Эшләр идарәсенә С.П.Горбунов исемендәге Казан авиация җитештерү берләшмәсендә эшләнгән ике Ту-214 самолеты тапшырылды.

Самолетларның символик ачкычларын тапшыру тантанасында ТР Премьер-министры Рөстәм Миңнеханов, "С.П.Горбунов исемендәге Казан авиация җитештерү берләшмәсе" ачык акционерлык җәмгыяте генераль директоры Васил Каюмов, "Берләштерелгән авиатөзелеш корпорациясе" ачык акционерлык җәмгыяте президенты Алексей Федоров, "Туполев" ачык акционерлык җәмгыяте президенты Игорь Шевчук, Россия сәнәгатьчеләр һәм эшкуарлар берлеге җитәкчесе Александр Шохин катнашты.

Тантаналы митингта кунаклар һәм заводта эшләүчеләр каршында ТР Премьер-министры Рөстәм Миңнеханов чыгыш ясады. "Бүген бездә зур бәйрәм. Бездә җитештерелгән 11 Ту-214 самолеты күкне иңли, ә бүген исә без өр-яңа машиналар тапшырабыз", - диде ул.

Рөстәм Миңнеханов әлеге машиналарны эшләүдә катнашкан барлык кешеләргә рәхмәт белдерде. "Бу - заказчылар тарафыннан куелган барлык бурычларны хәл итә торган өр-яңа машиналар, аларны эшләү дәрәҗәсе иң югары таләпләргә дә җавап бирә", - дип ассызыклады ул.

"Бүген без катлаулы чорда яшибез, әмма без мондый заказларны алуыбызга шатланырга гына тиеш. Бүгенге көндә Казан заводы Берләштерелгән авиатөзелеш корпорациясенә керү буенча катлаулы процедура уза. Бу - безнең уртак проект", - диде Премьер.

ТР Премьер-министры һава судноларын төзүдә аеруча тырышып эшләгән авиатехник һәм слесарьларга, шулай ук С.П.Горбунов исемендәге Казан авиация җитештерү берләшмәсенең профсоюз комитеты рәисе Альберт Чудаковка Хөкүмәт бүләкләрен тапшырды.