Халыкара балаларны яклау көне

1 июнь көнне Халыкара балаларны яклау көнендә, Казанда "Беренче канал"ның "йолдызлы десанты" төшәчәк.

ТР Президенты каршындагы социаль мәсьәләләр буенча дәүләт киңәшчесе Татьяна Ларионова хәбәр итүенчә, 1 июньдә Татарстан башкаласында балаларга "Беренче канал"ның йолдызлары катнашында мәдәни-күңел ачу, спорт һәм хәйрия чараларыннан торган зур программа тәкъдим ителәчәк. Балалар барлык чараларга да бушлай керә ала.

Бүген иртән Казанга "Беренче канал"ның 110га якын йолдызы килер дип көтелә, алар арасында танылган артистлар, башкаручылар бар. Балалар көне Балалар республика клиник хастаханәсендә старт ала. Аннары Мәскәү делегациясе берничә төркемгә бүленеп мөмкинлекләре чикләнгән балалар һәм яшүсмерләр өчен Казан реабилитация үзәгендә, Казанның 2нче психоневрология шифаханәсендә, "Здравушка" реабилитация үзәгендә, 100 ятим бала тәрбияләнә торган Казан Суворов хәрби училищесында, Идел буе районындагы балалар йортында булачак. Шулай ук "Беренче канал" йолдызлары Татарстанның 4 социаль учреждениесенә автобуслар тапшыру тантанасында катнашачак.

Көннең икенче яртысында чаралар "Ривьера", "Татнефть-арена"да, шулай ук "Баскет-холл"да "Июнь стартлары - бергә старт алабыз" турнирының финалы узачак. Т.Ларионова сүзләренчә, "Ривьера" шугалагында балаларга "Бозлык чоры - балаларга" программасы тәкъдим ителә. "Бозлык чоры"нда катнашучы, танылган телевидение алып баручысы Екатерина Стриженова мастер-класс алып барыр, дип планлаштырыла. "Ривьера" аквапаркында балалар өчен мастер-классны синхронлы йөзү буенча Олимпия чемпионы Мария Киселева үткәрәчәк. "Ривьера" кинозалларының берсендә "Ералаш" тапшыруының "әтисе" Борис Грачевский әти-әниләр һәм балалар мөнәсәбәтләре турындагы "Түбәдә" дип аталган фәлсәфи фильмын тәкъдир итә.

"Татнефть-арена" янындагы территориядә балалар "Беренче канал" йолдызлары белән фотога төшә ала. Ә 16 сәгатьтә боз сараенда финал шоуы башлана, анда 5 мең бала чакырылган. Бәйрәм программасын алып баручыларның берсе - Александр Олешко. Шоу кысаларында "Фабрика", "Дакота", "Челси" төркемнәре, шулай ук Жасмин, Варвара, Анита Цой һ.б. үз номерларын тәкъдим итәчәк.

"Без 1 июнь балаларга күп итеп уңай эмоцияләр бүләк итәр дип ышанабыз", - дип билгеләп үтте Татьяна Ларионова.