Әсгать Галимҗанов 70 нче автобусын Арчадагы "Өмет чаткысы" тернәкләндерү үзәгенә тапшырды

1 июнь - Балаларны халыкара яклау көнендә Казанда Хәйрияче һәйкәле янында танылган хәйрияче Әсгать Галимҗанов 70 нче автобусын мөмкинлекләре чикләнгән балалар һәм яшүсмерләрнең Арчадагы "Өмет чаткысы" тернәкләндерү үзәгенә тапшырды.

"Балалар сәламәт булсын, автобуста рәхәтләнеп йөрсеннәр", - диде Әсгать Галимҗанов һәм республикада хәйриячелек эшчәнлеген җәелдереп җибәргәне өчен, ТР Президенты Минтимер Шәймиевкә рәхмәтен белдерде, аңа сәламәтлек теләде.

Билгеле булганча, Әсгать Галимҗанов гомере буе колхоз базарында аты белән азык-төлек калдыкларын җыеп, терлек симертеп сатып, Татарстан гына түгел, Россия Федерациясенең балалар йортларына автобуслар сатып алып бүләк итте. Берәр җирдә кайгы булса, җир тетрәсә, ул, беренчеләрдән булып, шунда ярдәм җибәрде.

Хәйрияче мохтаҗларга, авыруларга, ятимнәргә рухи һәм матди ярдәм оештырып, меңнәрчә кешене коточкыч авырулардан аралап калган, шәфкать символына әверелгән Тереза ананы - иң өметсез чакларда да кешедә өмет чаткысы кабыза алган изге ананы һәр яктан үзенә үрнәк итеп куя. Ә.Галимҗанов 1990 елда БМОның Балалар фонды башкарма директоры Джеймс Грант һәм Тереза анакай белән беррәттән, Лев Толстой исемендәге халыкара алтын медаль лауреаты була. Бу медаль балаларны яклау юлындагы фидакарьлек һәм гуманизм өчен бирелә.

Әсгать Галимҗанов - шулай ук "Хезмәт Кызыл Байрагы" һәм "Татарстан Республикасы алдындагы хезмәтләре" орденнары, "Ышаныч һәм тугрылык өчен" халыкара премиясе, Андрей Первозванный ордены һәм башка дәүләт бүләкләре иясе. Хәйрияче Хәйрия эшчәнлеге мәсьәләләре буенча республика Советы әгъзасы да булып тора.

Узган елның 30 августында Казанда 1000 еллык мәйданында - төзекләндерелгән скверда Хәйриячегә һәйкәл ачылды. Хәйрияче образында Татарстан һәм Россиядә данлыклы меценат Әсгать Галимҗан улы Галимҗанов чагылыш тапкан. Һәйкәл ТР Президенты Минтимер Шәймиев инициативасы белән, аларның гаилә акчасына куелды. Хәйрияче һәйкәле скульптор Асия Миңнуллина җитәкчелегендәге скульпторлар төркеме тарафыннан эшләнгән. Бронзадан коелган һәйкәл игелек кылучы, җиккән атка арба тагып, арбасына балалар утыртып йөрткән бабайны гәүдәләндерә.