Мәскәүдә Сабантуйга әзерләнәләр

16 июньдә Люберцыда Мәскәү өлкәсендә Сабантуй бәйрәмен оештыру комитеты утырышы булды. Утырыш Люберцы муниципаль районы хакимияте башлыгының беренче урынбасары Ирина Назарина рәислегендә узды. Асылда, бу - 20 июньдә шәһәрнең мәдәният һәм ял паркында узачак Сабантуй бәйрәмен оештыру комитетының соңгы утырышы. Шунлыктан, анда бәйрәмгә җәлеп ителгән барлык хезмәтләр һәм юнәлешләрнең (җәмәгать туклануы, транспорт, милиция, спорт, сәламәтлек саклау, мәдәният, сәүдә һәм башкалар) җитәкчеләре чыгыш ясады.

Сүз уңаеннан, быелгы Мәскәү өлкәсе Сабан туена Буа районы шефлык күрсәтә. Люберцы муниципаль районы башлыгы Владимир Ружицкий Мәскәү өлкәсе Төбәк татар милли-мәдәни мохтарияте президенты Фәрит Мохтасаров белән бергә Татарстан Республикасында кунакта булды, Буа район Сабан туенда катнашты. Алар Буадан соклангыч хис-тойгылар һәм Люберцыдагы Сабантуйны да шундый ук истә калырлык итеп оештыру бурычы белән кайтты. 2009 елгы Сабантуйның Мәскәү өлкәсе Төбәк татар милли-мәдәни мохтариятенең 10 еллык юбилее белән туры килүен исәпкә алсак, бурыч бик тә җаваплы.

Шул ук көнне, 16 июньдә Мәскәү Сабантуен оештыру комитеты әгъзалары да җыелды. Мәскәүдә Сабантуй 4 июльдә "Битца" ат-спорт комплексында узачак. Биредә хәл итәсе мәсьәләләр аз түгел. Ат-спорт комплексын сәнгати яктан бизисе, Мәскәү, Татарстан һәм Башкортстан предприятиеләренең сәүдә нокталарын урнаштырасы, сәхнә һәм уен мәйданчыкларын җиһазлыйсы, спорт ярышлары, төрле уеннарда катнашучылар һәм җиңүчеләргә бүләкләр сатып аласы бар.

Мәскәү өлкәсендә Сабантуй бәйрәме колачын елдан-ел киңәйтә. Татарлар яшәгән һәр җирдә "кече Сабантуйлар" үткәрелә. Мисал өчен, 30 майда Люблинода Көньяк-Көнчыгыш округы район Сабан туен бәйрәм иттеләр. 27 июньдә Сабантуй Домодедовода узачак.