Төркия консулын кабул итү

Татарстан Президенты Минтимер Шаймиев 22 октябрьдә үзенең резиденциясендә Төркия Республикасының Казандагы Генераль консулы Сефа Юджеэрны кабул итте.

Шуны искә төшереп узабыз, Юджеэр әфәнде Генераль консул вазифаларына шушы елның 1 октябрендә керешкән иде. Моңа хәтле ул Төркия Тышкы эшләр министрлыгында, Ливиядә Төркия илчелеге секретаре, Лос-Анджелеста (АКШ) илчелекнең вице-консулы, Тәһранда (Иран) илчелек секретаре һәм Алма-Атада (Казахстан) илчелек киңәшчесе булып эшләде.

Очрашу вакытында, аерым алганда, ике яклы сәүдә-икътисадый һәм фәнни-мәдәни хезмәттәшлекне киңәйтү мәсьәләләрен, Төркия Республикасы Президенты Әхмәт Недждет Сезәр һәм Татарстан Президенты Минтимер Шәймиевнең 4 октябрьдә Әнкарәдәге очрашуында ирешелгән килешүләрне хәл итү ысуллары тикшерелде.

Консул Исмәгыйл Сефа Юджеэр фикеренчә, Татарстан һәм Төркия арасында төзелеш өлкәсендә яхшы проектлар бар, алар кече һәм уртача кәсәбәчелекне активлаштыру тәҗрибәсен уртаклашырга әзер. Төркия Татарстан нефть химиясе продукциясен сатып алу белән кызыксына. Иң якын арада Татарстаннан Төркиягә нефть озатыла башлый. Без, Төркия һәм Татарстан арасындагы мөнәсәбәтләр Россия Федерациясе белән мөнәсәбәтләрне үстерүдә күпер булып хезмәт итәр, дип саныйбыз, диде Юджеэр әфәнде.

Очрашуда Татарстан Президенты Аппараты җитәкчесе Әгъзам Гобәйдуллин һәм ТР Президентының Тышкы элемтәләр департаменты директоры Тимур Акулов катнашты.