Россиядә милли сәясәт камилләшәчәк

4 июльдә Казан Кремлендә Татарстан Президенты Минтимер Шәймиев һәм РФ министры Владимир Зорин очрашты. Бу очрашуда дәүләт милли сәясәтен, шулай ук III Бөтендөнья татар конгрессы карарларын һәм аның йомгаклары буенча Россия Федерациясе Президенты күрсәтмәләрен тормышка ашыру мәсьәләләре тикшерелде.

Очрашу барышында яклар дәүләт милли сәясәте концепциясен камилләштерү зарурлыгы турындагы нәтиҗәгә килде. Аның төп нигезләмәләрен көчендә калдырырга, әмма аерым аспектларын яңадан карарга кирәк. Җиде ел яшәү дәверендә концепция үзенең актуальлеген берникадәр югалтты, аның аерым нигезләмәләре йә ясалма булып чыкты, йә алар камилләштерелүгә мохтаҗ.

Агымдагы ел ахырына халык санын алу йомгаклары чыгарылачак. Аның нәтиҗәсе федераль максатчыл программаларга төгәллек кертү, өстәмә рәвештә милли мәктәпләр ачу, китап бастырып чыгару күләмен билгеләү, дәүләт милли сәясәтен тормышка ашыруда башка юнәлешләргә төгәллек кертү мөмкинлеге бирәчәк.

Әгәр дәүләт игътибар бирмәсә, алар проблемага әверелергә мөмкин. Россия - күп милләтле дәүләт. Анда диннәр арасындагы факторлар һәм этник проблемалар бар, дип әйтеп узды Владимир Зорин.

Концепцияне өч юнәлештә камилләштерергә кирәк. Беренчедән, аны тормышка ашыру механизмын көчәйтергә, икенчедән, телгә, мәдәнияткә һәм мәгълүматка хокукны тормышка ашыру өчен өстәмә чаралар булдырырга кирәк, өченчедән, кире элемтә, иҗтимагый – милли оешмалар, башкарма һәм законнар чыгару хакимияте органнары арасында үзара хезмәттәшлек институтларын камилләштерү зарур. Бүгенгә әле халык санын алу мәгълүматлары булмаса да, шуны әйтергә мөмкин: җәмгыятькә реформа ясауның барлык кыенлыкларына карамастан, Россия дәүләте бер генә милләтне дә, бер генә этник төркемне дә югалтмады. Ихтимал, алар хәтта берникадәр күбрәк тә булыр.

Минтимер Шәймиев һәм Владимир Зорин, комиссия әгъзалары буларак, Казанның 1000 еллыгын бәйрәм итүгә хәзерлек барышын тикшерде, Татарстан башкаласының Санкт-Петербургтан эстафетаны алуын әйтеп узды. Булачак бәйрәм бүгенгә Россиядә төп иҗтимагый - сәяси вакыйга булып тора. Шушы дата, федерализм һәм Россия дәүләтчелеге темасын күтәрү мөмкинлеге бирү белән чикләнмичә, Татарстан мисалында мәдәниятләрнең нәтиҗәле диалогын күрсәтү мөмкинлеге дә бирер.

Очрашуда ТР Премьер-министры урынбасары Зилә Вәлиева катнашты.